ვერა ბრეჟნევა და კონსტანტინე მელაძე განქორწინების ზღვარზე არიან - ამის მიზეზად ომი იქცა?
ვერა ბრეჟნევა და კონსტანტინე მელაძე განქორწინების ზღვარზე არიან, როგორც რუსული და უკრაინული მედია წერს, წყვილს განსხვავებული პოლიტიკური შეხედულებები აქვთ.
უკრაინაში რუსეთის სრულმასშტაბიანი შეჭრიდან დღემდე კომპოზიტორ კონსტანტინე მელაძეს არასოდეს უსაუბრია ომზე. მისი მეუღლე ვერა ბრეჟნევა კი დღემდე აქტიურად არის ჩართული მოხალისეობრივ საქმიანობაში. ის რამდენჯერმე ნახეს, როგორ მუშაობდა დევნილთა ბანაკებში, მათ შორის სატვირთოდან ჰუმანიტარული ტვირთის გადმოტანაშიც კი მონაწილეობდა.
რუსული მედია ვარაუდობს, რომ კონსტანტინე მელაძის პოზიცია იმით არის განპირობებული, რომ მას არ სურს რუსეთში წარმატებული ბიზნესი დაკარგოს. და სწორედ ამ პოზიციამ შეიძლება უარყოფითად იმოქმედოს წყვილის თანაცხოვრებაზე.
შეგახსენებთ, რომ ვერა ბრეჟნევამ და კონსტანტინე მელაძემ ოფიციალურად 2015 წელს მოაწერეს ხელი. საქორწინო ცერემონიალი იტალიაში გაიმართა. წყვილს საერთო შვილები არ ჰყავთ, მაგრამ ბრეჟნევას ხშირად უთქვამს, რომ ოცნებობს კონტანტინესთან ვაჟის ყოლაზე.
ძმები მელაძეები წლებია რუსეთში ცხოვრობენ. მათი ბიზნესი და ქონება რამდენიმე მილიონად არის შეფასებული. ძმისგან განსხვავებით ვალერი მელაძემ უკრაინაში რუსეთის მიერ დაწყებული ომი დაგმო და ამის გამო, რუსეთში ვარსკვლავი დაბლოკეს. მას აღარ იწვევენ კონცერტებზე და უფრო მეტიც, ყოფილი თაყვანისმცემლები რუსეთიდან მის გაძევებასაც კი ითხოვენ. ამის მიუხედავად, ვალერი მელაძეს რუსეთი არ დაუტოვებია, მაგრამ მიატოვა საყვარელი საქმე, სიმღერა... როგორც ჩანს, ძმებ მელაძეებს რუსეთში სერიოზული ქონება და ბიზნესი აკავებთ.
ბოლო ინფორმაციით, ომის დაწყების დროს, კონსტანტინე მელაძე კიევში, სიდედრის სახლში იმყოფებოდა. მოგვიანებით კი იტალიაში წავიდა. ამ ეტაპზე უცნობია, სად არის კონსტანტინე მელაძე, რომელიც, შესაძლოა, ცოლმა მიატოვოს.