ვინ არის ირაკლი ხომასურიძე, რომელიც ხათუნა სამნიძესა და დავით ბერძენიშვილზე თავდასხმისთვის დააკავეს?
8 ივნისს, "რესპუბლიკური პარტიის“ თავმჯდომარეს ხათუნა სამნიძეს და დავით ბერძენიშვილს რუსთაველის გამზირზე ორი მამაკაცი თავს დაესხა და სიტყვიერი და ფიზიკური შეურაცხყოფა მიაყენა. "თავს დაგვესხნენ ფიზიკურადაც, იყო ხელის კვრაც, გინებაც, მოგვდევდნენ, მე და დათო ბერძენიშვილს. ახლა პატრულმა დააკავა. მთავარი ფრაზა იყო "აქ მარტო ვერ გაივლით დაცვის გარეშე, ისეთ დღეში ჩაგაყენებთ. ვიღაც ორი ადამიანი იყო, ქაშვეთთან იდგნენ,“- განაცხადა ხათუნა სამნიძემ. მან შემთხვევის ადგილზე გამოიძახა საპატრულო პოლიცია. დეპუტატის თქმით, თავდამსხმელები მათ სამართალდამცავების თანდასწრებითაც ემუქრებოდნენ. "ყვიროდნენ, - მეფეზე როგორ ლაპარაკობთო”, - იხსენებს ხათუნა სამნიძე.
სამართლადმაცავებამ დააკავეს ირაკლი ხომასურიძე და ვეფხია ღვალაძე, ეს უკანასკნელი მალევე გაათავიუსფლეს, ხომასურიძის სასამართლო პროცესი კი, სავარაუდოდ, დღეს გაიმართება.
ცნობისთვის, ირაკლი ხომასურიძეს ბრალი ოფიციალურად გუშინ წარუდგინეს. მას ბრალდება საქართველოს სისხლის სამართლის კოდექსის 156-ე მუხლის მე-2 ნაწილის „ა“ ქვეპუნქტით (ადამიანის დევნა მის პოლიტიკურ მოღვაწეობასთან დაკავშირებით, ჩადენილი ძალადობით) წარედგინა.
ვინ არის ირაკლი ხომასურიძე?
ირაკლი ხომასურიძე ჰომოფობიური და ძალადობრივი ჯგუფების სხვადასხვა აქციებში ხშირად მონაწილეობს. საზოგადოებას თავი განსაკუთრებით დაამახსოვრა ლევან აკინის ცნობილი ფილმის "და ჩვენ ვიცეკვეთ" ჩვენების საწინააღმდეგოდ გამართულ აქციაზე, როდესაც განაცხადა: "ეს ფილმი თუ გავიდა, მე ცოცხალი სახლში არ წავალ…“ ხოლო, როდესაც უთხრეს, რომ ფილმი უკვე გადიოდა, მისი ნათქვამი ფრაზა: „გადისო კინო, გადისო“, - ბევრს დღემდე ახსოვს.
"მარტო ვცხოვრობ, ცოლ-შვილი არასოდეს მყოლია. მინდოდა, მღვდელი ვყოფილიყავი, მაგრამ ჩემი პრობლემის გამო, თვალი რომ დავკარგე, ვეღარ შევძელი, არ გამოვიდა”, - აცხადებდა ის ერთ-ერთ ინტერვიუში.
როგორც ირკვევა, მან თვალი 2009 წლის 6 მაისს, სააკაშვილის ხელისუფლების წინააღმდეგ გია გაჩეჩილაძის (უცნობის) ორგანიზებული საპროტესტო აქციის დროს დაკარგა. (წყარო)