„თუკი რეზოლუცია არ არის დამყარებული ობიექტურ სინამდვილესა და სიმართლეზე, მას ყოველთვის ჩალის ფასი ექნება“ - კვირის პალიტრა

„თუკი რეზოლუცია არ არის დამყარებული ობიექტურ სინამდვილესა და სიმართლეზე, მას ყოველთვის ჩალის ფასი ექნება“

„ის, რომ ივანიშვილი ხელს უშლის საქართველოში დემოკრატიის განვითარებას, ისეთივე სიცრუეა, როგორიც ის, რომ სააკაშვილის პერიოდში დემოკრატია ყვაოდა“

"ჩვენ კანდიდატობაზე იმიტომ მივმართეთ, პოლიტიკური დასტური ყოფილიყო, რომ საქართველოს, ასე მძიმე მდგომარეობაში მყოფ ქვეყანას, ევროსტრუქტურებმა პოლიტიკურად დაუჭირონ მხარი. მე დარწმუნებული ვარ, ევროსაბჭო, ევროკავშირის ქვეყნების პოლიტიკური ხელმძღვანელობა, სწორედ ამ ფაქტორს გაითვალისწინებს", - ამბობს "ქართული ოცნების" ერთ-ერთი ლიდერი, პარლამენტის ვიცე-სპიკერი გია ვოლსკი. რამდენად იქნება შესაძლებელი, რომ ევროკომისიამ ეს რეზოლუცია არ გაითვალისწინოს და რას აკეთებს ამისთვის "ქართული ოცნება", ამ საკითხებზე გია ვოლსკის ვესაუბრეთ:

- ეს პოლიტიკური გადაწყვეტილებაა, რომელიც მიიღო გარკვეულმა გავლენიანმა ევროპარლამენტარების ჯგუფმა, ძირითადად, "სახალხო პარტიამ". მათ მიაჩნიათ, რომ "ნაცმოძრაობა" არ უნდა ჩაჰბარდეს წარსულს, მათი ლიდერი გათავისუფლდეს და კვლავ ჩაუდგეს სათავეში. ეს აისახა რეზოლუციის ტექსტში. თუმცა ყველა ასე არ ფიქრობს. 705 პარლამენტარიდან 308-მ მხარი დაუჭირა რეზოლუციას, 218-მა არა, რაც იმას ნიშნავს, რომ ბევრი ამის წინააღმდეგია. გარდა ამისა, შეგახსენებთ, რომ აპრილის ბოლოს ევროსაბჭომ მიიღო რეზოლუცია, სადაც საქართველოს ძალიან მაღალი შეფასებები მისცეს ინტეგრაციისთვის გაწეული მუშაობისთვის.

თავისთავად რეზოლუცია აგებულია მთელ რიგ ფაქტობრივ უზუსტობებზე. მაგალითად, ნათქვამია, რომ სააკაშვილი ციხეშია და მას არ ეძლევა საავადმყოფოში გადასვლის საშუალება; ის ტრაგედია, რაც საქართველოში დატრიალდა ლექსო ლაშქარავას გარდაცვალებასთან დაკავშირებით, პირდაპირ მიწერილია 5 ივლისის ძალადობის ფაქტზე, რაც ასევე არ არის სიმართლე. გარდა ამისა, 5 ივლისი შეფასებულია როგორც მედიის უფლებების დარღვევა, რაც სახელმწიფოებრივ რანგში აქვთ აყვანილი და არაფერია ნათქვამი იმაზე, რომ ამდენი სისხლის სამართლის საქმე აღიძრა და ამდენი პირია პასუხისგებაში მიცემული.

- 5 ივლისი ახსენეთ, მაგრამ ამაზე საუბარი შორს წაგვიყვანს. რეზოლუციაში ლაპარაკია ხელისუფლების პირველი პირების წინასწარ განცხადებებზე, რამაც, როგორც ფიქრობენ, წაახალისა ძალადობა, რომ არ არიან დაკავებული ორგანიზატორები, და რაც მთავარია, ლაშქარავას გარდაცვალების მიზეზებზე.

- როგორ შეიძლება ეს სახელმწიფოს დაგეგმილი და მით უმეტეს, ორგანიზებული ყოფილიყო? რაც მთავარია, ის პირები, რომლებიც ამ რეზოლუციას ედგნენ სათავეში, მაგალითად, ევროპარლამენტარები რასა იუკნევიჩიანე და ანდრიუს კუბილიუსი, ხაზგასმით აღნიშნავენ, რომ სააკაშვილია მთავარი მიზეზი იმ დამოკიდებულებისა, რომელიც საქართველოს მიმართ უნდა გაგაჩნდეს და ხაზგასმით აღნიშნავენ, რომ სტრასბურგის სასამართლოს მიერ დადგენილი დანაშაულები არაფერს ნიშნავს. უტრირებას ვაკეთებ, მაგრამ გამოდის, რომ წამებით დახოცილი ადამიანების მიუხედავად, სააკაშვილის ხელისუფლება უფრო ახლოს ყოფილა ევროპასთან, ვიდრე დღეს, სადაც 90-იანი წლებიდან მოყოლებული მედიის თავისუფლების საქმეში რადიკალური ცვლილებაა უკეთესობისკენ. არის სხვა გარემოებებიც, ის, რაც ახლა მსოფლიოში ხდება, რამაც შეიძლება განაპირობა არა მარტო საქართველოს მიმართ ასეთი ნეგატიური დამოკიდებულება. მაგალითად, მოლდოვის საკითხი პოზიტიურად აქვთ წამოწეული, მაშინ როცა მოლდოვა ნეიტრალიტეტს აცხადებს და დსთ-ის წევრია. ეს არის საქართველოს მიმართ ამ პოლიტიკოსთა ჯგუფის ნეგატიური დამოკიდებულების შედეგი.

- ანუ თქვენც ამბობთ, რომ ეს ჯგუფი "ნაციონალებმა" საკუთარი მიზნებისთვის გამოიყენეს?

- ვერ ვიტყვი, რომ "ნაციონალურმა მოძრაობამ" გამოიყენა. კი არ გამოიყენა, ეს არის ერთი მონოლითური ჯგუფი, რომელიც მუდმივად უტევდა საქართველოს მას შემდეგ, რაც ხელისუფლება შეიცვალა - უტევდა საქართველოს და არა ხელისუფლებას. სამწუხაროა, რომ ამას ქვეყნის ინტერესები ეწირება.

- ამ რეზოლუციის მხარდამჭერებში არის ის ჯგუფიც, რომლის პარტნიორია "ქართული ოცნება". ამას როგორ ხსნით?

- იმ ჯგუფში, რომელმაც ხმა მისცა რეზოლუციას, სოციალისტებიც არიან და "ალდეს" წევრებიც. გარდა იმისა, რომ "სახალხო პარტიას" აქვს დიდი გავლენა, არის ფეიკნიუსებიც. თვეების განმავლობაში მთელი მექანიზმი ჩამოყალიბდა, რაც გავლენას ახდენს. ამასთან, ვითარება მსოფლიოსა და რეგიონში ძალიან დაძაბულია.

უკრაინული მედია ჩვენი პოლიტიკური ოპონენტების გამოყენებით ყოველდღიურად ილაშქრებს ჩვენზე, რადგან არ ჩავერთეთ საომარ მოქმედებებში, არ გავხსენით მეორე ფრონტი, დემონსტრაციულად და ორგანიზებულად არ გავგზავნეთ მოხალისეები. ის, რომ ჰუმანიტარული დახმარება საკმაოდ დიდი და ინტენსიური იყო, არაფრად ჩაითვალა. პოლიტიკური დახმარება და თანადგომა, განსაკუთრებით ჰააგის ტრიბუნალისთვის მიმართვა რუსეთის დანაშაულებზე თითქოს არაფერია. აშკარაა, გაცხადებულად არა, მაგრამ ეს ჯგუფი მხარს უჭერს, რომ საქართველომ მეორე ფრონტი გახსნას. ეს რეზოლუციაც პასუხია იმ დამოკიდებულებაზე, რომელიც საქართველოს ამ საკითხებზე აქვს. თუნდაც ეკონომიკური სანქციების თაობაზე, რაც საქართველოს დანგრევით ემუქრება. ეს რეზოლუცია, გარდა იმისა, რაც ზემოთ მოგახსენეთ, არის პასუხი დაუმორჩილებლობაზე, რომ გაიხსნას მეორე ფრონტი და საქართველო საომარ მოქმედებებში ამა თუ იმ ფორმით ჩაერთოს.

- ანუ ფიქრობთ, რომ მათი შენიშვნები საბაბია და საქართველოში ეს პრობლემები რომ არ ყოფილიყო, მაინც ასეთ რეზოლუციას მიიღებდნენ?

- ზედაპირზეა ყველაფერი, არ სჭირდება სიღრმისეული ანალიზი. ერთ-ერთ რეზოლუციაში, რომელიც მოამზადა "სახალხო პარტიის" ჯგუფმა, მედიის თავისუფლებაზეა საუბარი და უალტერნატივოდ მიიღეს - ანუ ის პერიოდი, როდესაც რამდენიმე მედიაკომპანია არსებობდა და მათ პირადად სააკაშვილი აკონტროლებდა, საჩვენებლად დატოვეს მხოლოდ "კავკასია", რომელსაც არც გავრცელების რესურსი ჰქონდა და როგორც ახლა გაირკვა, ოპოზიციურ ფლანგს თამაშობდა. ახლა კი ნებისმიერ მედიასაშუალებას ნებისმიერი პოზიციით შეუძლია გამოსვლა და უფრო მეტიც, ნებისმიერ ადამიანს მარტივად შეუძლია მედიის დარეგისტრირება და ფუნქციონირება. ასეთი თავისუფლება მედიას და თუნდაც ჟურნალისტებს არ ჰქონიათ. იმდენად უსამართლოა ეს დამოკიდებულება, რომ ბუნებრივად გვაბრუნებს იმ განცხადებასთან, რომელზეც თავში ვილაპარაკე. ვგულისხმობ კუბილიუსისა და იუკნევიჩიანეს განცხადებებს, სადაც პირდაპირ არის ნათქვამი, რომ სააკაშვილი უნდა დაუბრუნდეს ლიდერის პოზიციას, თითქოს ის უკრაინის მოქალაქე და მაღალჩინოსანი არ იყოს.

- მმართველი პარტია ძალიან გააბრაზა ივანიშვილის სანქცირების საკითხმა. თქვენი შეფასებით, რა გავლენა იქონია ამ საკითხმა რეზოლუციაზე და ეს რომ არ ყოფილიყო, "ოცნებას" უკრაინა-მოლდოვისგან საქართველოს ჩამოშორებაზე ასეთივე რეაგირება ექნებოდა?

- ივანიშვილმა ჩამოაყალიბა კარგად ორგანიზებული, ინტელექტუალურად მომზადებული გუნდი, რომელიც სახელმწიფოს მართვაში არის ჩართული. რასაკვირველია, იყო სკანდალური მომენტებიც, თუნდაც გახარიას საკითხი და კვირიკაშვილის გადადგომა, მაგრამ რეალურად სახელმწიფოს მართვის სისტემა გამართულია. ჩვენ ყველა რეიტინგში უმაღლესი მაჩვენებლები გვაქვს, თან არა მარტო რეგიონში, არამედ რეიტინგები მეტყველებს, რომ ჩვენ გვაქვს უკეთესი მაჩვენებლები, ვიდრე ევროკავშირის ზოგიერთ სახელმწიფოს. აქედან გამომდინარე, იმის აუცილებლობა არ არსებობს, რომ ივანიშვილი დაუბრუნდეს მართვის სისტემას. მეორე მხრივ, ის არის„"ქართული ოცნების" ჩამომყალიბებელი და, რასაკვირველია, არასდროს იქნება მივიწყებული, რადგან მან შეცვალა სისტემა. რაც მთავარია, ივანიშვილი დღეს დაკავებულია ისეთი საკითხებით, როგორიც არის მწვანე საფარველის რეაბილიტაცია 800 ჰექტარზე, საერთაშორისო უნივერსიტეტის ფინანსური თანადგომით ან თუნდაც სიმსივნის სამკურნალო ცენტრის შექმნით. ის ამ პროექტებს აფინანსებს და როდესაც სანქციებზე ლაპარაკობენ, გამოდის, სურთ სანქციები დაუწესონ ყველა იმ პროექტს, რომლებიც საქართველოში ხორციელდება. ის, რომ ივანიშვილი ხელს უშლის საქართველოში დემოკრატიის განვითარებას, ისეთივე სიცრუეა, როგორიც ის, რომ სააკაშვილის პერიოდში დემოკრატია ყვაოდა და საქართველო ევროსტრუქტურებთან უფრო ახლოს იყო. ეს არის ადამიანი, რომელმაც ყოველივე თავისი გადადო, რათა ჩვენი ქვეყანა უკეთ იყოს და ამიტომ მასზე შეტევა საზოგადოების იმ ნაწილზე შეტევაა, რომელიც ენდობა, მხარს უჭერს „"ქართულ ოცნებას" და ამავე დროს მხარს უჭერს ევროინტეგრაციას. არის კიდევ ერთი დეტალი, რასაც ყურადღება უნდა მიექცეს - სწორედ "ქართული ოცნების" დამსახურებაა, რომ საზოგადოების დიდი ნაწილი მხარს უჭერს ევროინტეგრაციას. "ნაცმოძრაობა" ხალხს აჯერებდა, რომ ადამიანების წამება, ქონებისა და სიცოცხლის წართმევა ჩვეულებრივი ამბავია, ამ დროს კი თითქოს დემოკრატიის შუქურად თვლიდნენ. ამიტომ იყო საზოგადოებაში ევროპული სტრუქტურების მიმართ ნიჰილიზმი, ჩვენმა მყარმა პოზიციამ კი, რომ ევროსტრუქტურებში ინტეგრაცია აუცილებელია, საზოგადოების დიდ ნაწილს სკეპტიციზმი გაუქარწყლა.

- ეს ხომ უნდა იქცეს ხელშესახებ ფაქტად და რომ იქცეს, ეს ხომ ხელისუფლების პასუხისმგებლობაა? როდესაც სახელმწიფოს აქვს დიდი რესურსი, ამას რატომ ვერ ახერხებს?

- ხელშესახებ ფაქტად უნდა იქცეს, თუ განხილვა ობიექტურია. როდესაც ამის უკან გარკვეული ჯგუფების პოლიტიკური მიზნები და მერკანტილური ამოცანებია, ამას ემატება დამოკიდებულება ომის მიმართ, რასაკვირველია, ობიექტურობა საეჭვოა და შედეგიც სახეზეა.

- ანუ, როგორც კობახიძემ თქვა, ამ რეზოლუციას თქვენთვისაც ჩალის ფასი აქვს?

- კობახიძემ ერთი საინტერესო რამ თქვა, რომ ეს არის ფეიკზე აგებული რეზოლუცია, მაგრამ ეს არ ნიშნავს, რომ მოტყუებული ხალხის მიღებული რეზოლუციაა. რასაკვირველია, ნაწილობრივ ასეცაა, მაგრამ რეალურად ეს ფეიკი კონკრეტულმა პირებმა შექმნეს. რასაკვირველია, თუკი რეზოლუცია არ არის დამყარებული ობიექტურ სინამდვილესა და სიმართლეზე, მას ყოველთვის ჩალის ფასი ექნება. ჩვენ კანდიდატობაზე იმიტომ მივმართეთ, რომ საქართველოს, ასე მძიმე მდგომარეობაში მყოფ ქვეყანას, ევროსტრუქტურებმა პოლიტიკურად დაუჭირონ მხარი. დარწმუნებული ვარ, ევროსაბჭო, ევროკავშირის ქვეყნების პოლიტიკური ხელმძღვანელობა, ამ ფაქტორს გაითვალისწინებს და არა ფეიკებს. რაც შეეხება საქართველოს მდგომარეობას, ეს არ არის ორდინარული მდგომარეობა, რასაკვირველია, უკრაინა უმძიმეს ვითარებაშია. ეს ტრაგედიით აღსავსე პროცესია, რასაც, მსოფლიო სათანადოდ შეაფასებს, მაგრამ საქართველოს დიდი ნაწილი ოკუპირებულია, სადაც რუსეთი ძალიან მძლავრი სამხედრო ძალით არის და არა მარტო თბილისიდან 40 კილომეტრში, არამედ ცენტრალური მაგისტრალიდან, გაზსადენიდან და ნავთობსადენიდან რამდენიმე ასეულ მეტრში დგას რუსეთის ჯარი. მეორე საკითხია, რომ საქართველოს მოქალაქეების ძალიან დიდი ნაწილი მძევლად არის ოკუპირებულ ტერიტორიაზე, განსაკუთრებით აფხაზეთში. რაც მთავარია, რუსეთთან სამართლებრივი ბრძოლა გრძელდება და აღარ გავაგრძელებ იმაზე ლაპარაკს, ამ მხრივ სააკაშვილს რა ჰქონდა გაფუჭებული და ჩვენ რა გავაკეთეთ, სტრასბურგის სასამართლოთი დაწყებული და ჰააგის ტრიბუნალით დამთავრებული. საერთაშორისო სასამართლოში პროცესები მოვიგეთ და დავამტკიცეთ, რომ ოკუპაცია გრძელდება, ამხელა ტერიტორია ოკუპირებულია, ამდენი დევნილია, უკრაინას ამხელა პოლიტიკური და ჰუმანიტარული დახმარება გავუწიეთ - კი არ ვაყვედრით, მაგრამ მაინცდამაინც ჩვენ მიმართ ასეთი დამოკიდებულება ნიშნავს, რომ ეს ყველაფერი გარკვეული პოლიტიკური ჯგუფების ინტერესებსაც ემსახურება, რათა ცუდ მდგომარეობაში ჩაგვაყენონ.

- კობახიძემ ისიც თქვა, რომ ჩვენ განაცხადის შეტანას არ ვაპირებდით, რადგან მზად არ ვიყავით და გვაიძულეს, ეს შედეგი რომ მიგვეღოო. ნიშნავს ეს თუ არა, რომ ერთი მხრივ, ხელისუფლება აღარაფრის გაკეთებას არ აპირებს ვითარების გამოსასწორებლად და მეორე მხრივ, კობახიძე მთელ პასუხისმგებლობას ღარიბაშვილს აკისრებს?

- რასაკვირველია, 2024 წლისთვის ჩვენ ვალდებულებების შესრულების პროცენტი გაცილებით მაღალი გვექნებოდა და არ დაგავიწყდეთ, ხაზს ვუსვამ, რომ ევროპარლამენტის ასამბლეის რეზოლუციით შესრულების ხარისხი უმაღლეს დონეზეა შეფასებული, მაგრამ ეს მაინც არ არის დამთავრებული პროცესი და ნორმალური იქნებოდა, 2024 წელს შეგვეტანა. დღეს კი ჩვენ იმიტომ შევიტანეთ, რომ ჩავთვალეთ, ამ ფორსმაჟორულ სიტუაციაში ევროკავშირის პოლიტიკური მხარდაჭერა მნიშვნელოვანი იქნებოდა. თუმცა ახლა ჩვენ ევროკავშირის გადაწყვეტილებაზე არ ვლაპარაკობთ, ვლაპარაკობთ ევროპარლამენტართა მნიშვნელოვანი ნაწილის, მაგრამ არა უმრავლესობის, უსაფუძვლო დამოკიდებულებაზე. ცხადია, რეზოლუცია ლეგიტიმურად არის მიღებული, მაგრამ მხარს ევროპარლამენტართა ნახევარზე ნაკლები უჭერს.

რუსა მაჩაიძე