"თბილისში ღამით მთვრალი დავდიოდი, ვხატავდი კატას... 10 000 ლარით დამაჯარიმეს" - რას წერს მიხეილ ვრონსკი, კაცი, რომლის ნახატებმაც შეთქმულების თეორიები გააჩინა
თბილისის საქალაქო სასამართლომ რუსეთის მოქალაქე მიხეილ ვრონსკი 10 ათასი ლარით დააჯარიმა. ვრონსკი სწორედ ის ადამიანია, რომელიც თბილისში სხვადასხვა ადგილას კატის გამოსახულებას ხატავდა, ხოლო საზოგადოების ნაწილში ამის გამო სხვადასხვა შეთქმულების თეორია გააჩინა.
როგორც ირკვევა, კაცი საკუთარი კატის, "შიშას" გამოსახულებას თვეების განმავლობაში ნასვამ მდგომარეობაში ხატავდა. ნახატებით საზოგადოება რუსეთის მიერ უკრაინაში ომის დაწყების შემდეგ დაინტერესდა, რადგან გაჩნდა ეჭვი, რომ ის ამ გზით გარკვეულ მინიშნებებს ტოვებდა.ვრონსკის სოციალური ქსელის ანგარიშიდან ცნობილი ხდება, რომ ის საქართველოში თითქმის ერთი წელია იმყოფება. სახლში, სადაც მიხეილი ცხოვრობდა, სამართალდამცავებმა რამდენიმე საათიანი ჩხრეკა ჩაატარეს, დაკითხეს, თუმცა რუსულ არმიასთან, ან სპეცსამსახურებთან კავშირის დამადასტურებელი მტკიცებულება ვერ იპოვეს. მისი თქმით, საცხოვრებელ სახლში მხოლოდ "მოსაწევი“ აღმოაჩინეს.
თბილისის ქუჩებში აპრილში გამოჩენილმა კატის გამოსახულებებმა საზოგადოება შეაშინა. იდუმალი ნახატების ავტორი თბილისის ერთ-ერთ რესტორანში მზარეულად მუშაობს.
მიხეილ ვრონსკი "ინსტაგრამის" საკუთარ გვერდზე ამ თემაზე ვრცელ პოსტს აქვეყნებს და ფულის შესაგროვებლად საზოგადოებას დახმარებას სთხოვს.
მიხეილ ვრონსკი:
- ორიოდე კვირის წინ სასამართლო პროცესი მქონდა, დღეს გამოვიტანე განაჩენი და პასპორტი. პროკურორი თავდაპირველად 6-12 წლამდე თავისუფლების აღკვეთას ითხოვდა, მაგრამ 10 000 ლარის ჯარიმაზე დათანხმდა, რაც დაახლოებით 3400 დოლარს შეადგენს.
ადვოკატმა თქვა, რომ თუ ნახევარს მაინც გადავიხდი, მაშინ არ დამაკავებენ და საქართველოში შემოსვლის პრობლემა არ შემექმნება.
ყველაფერი იმით დაიწყო, რომ ღამით მთვრალი დავდიოდი, ვხატავდი კატას, რომელიც ფოტოზეა და რომელსაც შიშა ჰქვია. ომის დაწყებიდან რამდენიმე კვირის შემდეგ, აქტიურად დაიწყეს სოციალურ ქსელში პოსტების წერა, რომ ეს რაღაცას ნიშნავდა. ერთი სამხედრო ბლოგერი იმ დასკვნამდე მივიდა, რომ ჩემი სტენსილები მხოლოდ იმ ობიექტებზე იყო, სადაც დაბომბვის დროს თავის შეფარება იყო შესაძლებელი. დაიწერა ისიც, რომ ეს რუსული არტილერიის კვალი იყო. შიშას შესახებ ახალი ამბები გავრცელდა ინტერნეტში, გაზეთებსა და ცენტრალურ არხებზე.
ქართველებმა მასიურად დაიწყეს ჩივილი, რომ ეს ნაგავი იყო, ეკლესიამ გამოთქვა აზრი, რომ შიშაში სატანიზმის ნიშნებია. გარკვეული პერიოდის შემდეგ, პოლიცია იარაღით შემოიჭრა ჩემს საცხოვრებელში. სახლის გარეთ 15 მანქანა იდგა.
6 საათის განმავლობაში ეძებდნენ რუსული არმიის კვალს და მხოლოდ "მოსაწევი“ იპოვეს. შემდეგ თბილისში თითოეულ სტენსილთან შემომატარეს და მეკითხებოდნენ, მე დავხატე თუ არა. ამის შემდეგ იყო 12-საათიანი დაკითხვა, სადაც დავამტკიცე, რომ ეს უბრალოდ კატა იყო და არაფერი მაქვს საერთო სამხედროებთან.
გამოცდა ჩააბარეს ჩემმა ტელეფონებმა და ლეპტოპებმა. სასტიკად სიურეალისტური სიტუაციაა, მაგრამ სამწუხაროდ, მე მასში აღმოვჩნდი...“ - წერს მიხეილ ვრონსკი.