„ამ ვიზიტის შემდეგ ევროპარლამენტს სრული წარმოდგენა ექნება ოპოზიციის ქმედებებზე“ - კვირის პალიტრა

"მტრების შეცდომებზე ლაპარაკი ბევრს ვერაფერს მოგვიტანს. დასანანი და შესაწუხებელი სწორედ ის არის, როდესაც მეგობარი და მხარში მდგომი ადამიანის შეცდომას ამჩნევ და ამჩნევ იმიტომ, რომ გინდა ის უკეთესი იყოს", - ასე ხსნის მმართველი პარტიის წარმომადგენელი, პარლამენტის ადამიანის უფლებათა კომიტეტის თავმჯდომარე მიხეილ სარჯველაძე "კვირის პალიტრასთან" ევროკავშირის ელჩის საწინააღმდეგო განცხადებებს. რას ედავება "ქართული ოცნება" კარლ ჰარცელს, რატომ შეუტიეს აშშ-ის ელჩს და საქართველოში ვიზიტით მყოფ ევროპარლამენტარებს რაზე ესაუბრნენ, რა პროგრესზე შეიძლება ლაპარაკი ევროკავშირის წევრობის კანდიდატის სტატუსის მიღების პროცესში, ამ საკითხებზე "კვირის პალიტრა" მიხეილ სარჯველაძეს ესაუბრა.

- მაშინ როცა ქვეყნისთვის საგარეო­ პოლიტიკის მთავარი მიმართულება ევროკავშირში ინტეგრაციაა, ევროპარლამენტარების ნებისმიერი ვიზიტი ძალიან მნიშვნელოვანია. განსაკუთრებით, როცა ევროპარლამენტის საგარეო საქმეთა კომიტეტი აქ შეხვედრებს უმაღლეს დონეზე მართავს. რაც ყველაზე­ მნიშვნელოვანია, ეს იყო სიღრმისეული შეხვედრები სრული სურათის შესაქმნელად... განსაკუთრებით ყურადსაღებია ის სტარტი, რაც 12 პუნქტის შესრულების საქმეში გვაქვს, რათა სრული­ ინფორმაცია მიგვეწოდებინა ჩვენი კოლეგებისთვის ევროპარლამენტიდან. ალბათ, არანაკლებ მნიშვნელოვანია ისიც, რომ თავად გასცნობოდნენ, თუ რა კეთდება პირველი პუნქტის შესასრულებლად, დეპოლარიზაციისთვის... ამ ვიზიტის შემდეგ ევროპარლამენტს სრული წარმოდგენა ექნება ოპოზიციის ქმედებებზე. სრულიად უპასუხისმგებლოდ იქცევა ოპოზიციის ის ნაწილი, რომელიც მუშაობაში ჩართვაზე უარს აცხადებს. სამუშაოდ ცალკე ფორმატებს ქმნიან და არ აპირებენ ხელისუფლებასთან თანამშრომლობას. ამიტომ ევროპარლამენტარებს თავად ჰქონდათ ყველაფრის ნახვის შესაძლებლობა, თუ ვინ არის ის მხარე, ვინც შეიძლება ამ საკითხებს დესტრუქციულად უდგებოდეს.

- ხომ არ ყოფილა იმაზე მსჯელობა, რომ გაიწეროს, თითოეულ პუნქტს რა შემთხვევაში ჩათვლიან შესრულებულად, მერე ინტერპრეტირების საშუალება რომ არ გაჩნდეს?

- ვფიქრობ, ამ 12 პუნქტის­ შინაარსისა და ფორმულირებების გათვალისწინებით, რომელიც ბევრი თვალსაზრისით შეიძლება იყოს ინტერპრეტაციის საგანი ან განსხვავებული მოლოდინი არსებობდეს, საჭიროა კონსულტაციები. თუმცა წინა­სწარ ყველაფრის გაწერა და დეტალური გეგმის შედგენა, ალბათ, შეუძლებელია...

- დეპოლარიზაციად რა ჩაითვლება, ამის განსაზღვრა არ იქნებოდა ხელსაყრელი?

- თქვენ წარმოიდგინეთ, შესაძლოა ეს ყველაზე რთულად განსასაზღვრი იყოს, რადგან დეპოლარიზაცია ნიშნავს, რომ ოპოზიციამ და ხელისუფლებამ იპოვონ სივრცეები, სადაც ერთობლივად შევძლებთ შეხების წერტილების პოვნას. შეიძლება ყველა საკითხზე განსხვავებული ხედვა გვქონდეს? არ შეიძლება. ჩვენ ამისთვის ნაბიჯი გადავდგით და როდესაც ჩვენს კომიტეტში მე-11 პუნქტთან დაკავშირებით სამუშაო ჯგუფი იქმნებოდა, ოპოზიციის ერთ-ერთ ინიციატივას მხარი დავუჭირეთ. ოპოზიცია კი რას აკეთებს? ევროპარლამენტარებთან გამართული შეხვედრის შემდეგ განაცხადეს, რომ დეპოლარიზაციაზეც კი ცალკე აპირებენ მუშაობას. ეს ყველაფერი ოქსიმორონს ჰგავს, გვეუბნებიან, ერთად მუშაობა ისწავლეთო, ოპოზიცია კი ისევ ცალ-ცალკე მუშაობას გვთავაზობს.

- ევროპარლამენტარების ვიზიტი­ დაემთხვა ჯერ კარლ ჰარცელის შესახებ მმართველი პარტიის, რბილად რომ ვთქვათ, ძალიან ხმაურიან განცხადებებს, რაც შემდეგ სხვებმაც გაიმეორეს. რატომ თვლით, რომ ეს განცხადებები უნდა გაკეთებულიყო და რა მიზანი ჰქონდა?

- პირადად მე, როგორც ამ ქვეყნის მოქალაქე, ევროკავშირისა და ევროკავშირის საქართველოში მისიის მიმართ განსაკუთრებულ მადლიერებას გამოვხატავ. მათ დიდი მნიშვნელობის კეთილი საქმეები აქვთ ნაკეთები. ეს ორგანიზაცია ძალიან ბევრი პროგრესული გადაწყვეტილების მაინიცირებელი და მხარდამჭერი ყოფილა. საქართველოს ბოლოდროინდელი პროგრესის აქტორი და შემოქმედიც ევროკავშირის წარმომადგენლობა იყო. რაც შეეხება ბატონი კარლ ჰარცელის საქართველოში მოღვაწეობას, მისი ვადის ამოწურვა დაემთხვა სტატუსის მიღების პროცედურას. კეთილი საქმეებისთვის მადლობის სიტყვები კარლ ჰარცელსაც ეკუთვნის, მაგრამ არის საკითხები, რაშიც შეიძლება მას არ ვეთანხმებოდეთ. მისგან კარგიც გვახსოვს და ისეთი გადაწყვეტილებები და პოზიციებიც, რაც მთლად მოსაწონი არ არის. მაგალითად, მე ვფიქრობ, რომ ბატონი ჰარცელი შეიძლებოდა უფრო აქტიური ყოფილიყო მიშელის დოკუმენტის შესრულების პროცესში - კარგი იქნებოდა გვენახა "ნაცმოძრაობის" მიმართ უფრო აქტიური მოწოდებები, რომ უნდა მიერთებოდნენ დოკუმენტს.

- სტატუსის მიღებასთან დაკავშირებით კონკრეტულად რა იყო თქვენთვის ნაკლოვანი ჰარცელის ქმედებებიდან? რისი გაკეთება შეეძლო და არ გააკეთა?

- ვფიქრობ, რეზოლუციის მიღებისას ინფორმაცია, რომელსაც აწვდიდნენ, სრული არ იყო, ან არ იყო შესწავლილი და გამოკვლეული, და უფრო აქტიური რომ ყოფილიყო, შესაძლებელია ეს რეზოლუცია არ ყოფილიყო.

- უშუალოდ მასთან, თუნდაც არაფორმალურად, ამაზე საუბარი გქონიათ?­

- პირადად არა, თუმცა საჯარო გამოსვლებში არასდროს დამიმალავს, პირიქით, ჩემს მოვალეობად მიმაჩნია, ვისაც მეგობრად და პარტნიორად მივიჩნევ, თუ რამე შეცდომას უშვებს, ამაზე ვისაუბრო...

- შეტევა იყო ამერიკის ელჩზეც, რაც დიპლომატიური კორპუსის წინააღმდეგ წასვლად შეფასდა...

- დეგნანზე კრიტიკული საუბარი არ ყოფილა, არ გვითქვამს, რომ მან რამე დააშავა. პირიქით, თუკი საქართველოს დღეს აქვს ამბიცია, რომ რეგიონის ლიდერი სახელმწიფოა და კიდევ მეტი შეუძლია, შეუძლია დაიმკვიდროს ადგილი ევროპის ნაწილად, ამაში უზარმაზარი წვლილი ამერიკას მიუძღვის - ეს უდავო ჭეშმარიტებაა. რაც შეეხება დიპლომატიური კორპუსის წინააღმდეგ წასვლას, რასაკვირველია, ასე არ არის. ჩემთვის განსაკუთრებით­ ძვირფასია საქართველოში არსებული განწყობები ამერიკის, ევროკავშირის მიმართ, ამას ძალიან ვუფრთხილდები და ნებისმიერ კითხვაზე, რომლებიც საზოგადოებაში ჩნდება, უმჯობესია გაეცეს მკაფიო პასუხები. მაგალითად, რადგან გაჩნდა კითხვები მოსამართლეების შესახებ, ჯობდა გასცემოდა კონკრეტული პასუხი, რაც გააკეთა კიდეც ქალბატონმა დეგნანმა...

- ხელისუფლება პრეზიდენტმაც დაადანაშაულა კონსტიტუციის დარღვევაში. ზურაბიშვილიც რადიკალური ოპოზიცია ხომ არ არის?

- მეჩვენება, რომ ეს ბრალდებაც დაუსაბუთებელია. კონკრეტულად გვითხრას, დარღვევა რაში გამოიხატება?.. ყველაფერს რომ თავი დავანებოთ, თანამედროვე სამყაროში სადმე ჩასვლა-არჩასვლა არ წყვეტს საკითხებს... რა დავაკელით, სად შეიძლება ჩავარდნა ყოფილიყო, ამაზე სიამოვნებით მოვისმენ მისგან კონკრეტულ ახსნას.

- მაშინ რაში დასჭირდა ამის თქმა?

- რადიკალურ ოპოზიციას აღებული აქვს გეზი, რომ დრამატულად­ წარმოაჩინოს ვითარება­ და შექმნას აჟიოტაჟი, ამიტომ საქმეში ღრმად ჩახედული თუ არ ხარ, შეიძლება გავლენა იქონიოს. სხვათა შორის, 20 ივნისის აქციები რომ იყო, მაშინაც შეიმჩნეოდა ასეთი გავლენები პრეზიდენტის შეხედულებებზე. თუმცა მერე პრეზიდენტის ეს ემოციაც შეცვლილა.

- როდესაც დეპოლარიზაციაზე ვსაუბრობთ, მხოლოდ ოპოზიციისთვის დაბრალება, რომ პროცესში არ მონაწილეობს, რამდენად სამართლიანია? მაგალითად, ოპოზიციის თხოვნას­ რიგგარეშე სესიის დანიშვნის შესახებ პრეზიდენტიც დაეთანხმა, უმრავლესობამ კი ბოიკოტი გამოუცხადა. ხომ შეიძლებოდა ჩატარებულიყო სესია და თქვენ დაგენახვებინათ, რომ ერთობლივი მუშაობისთვის ნაბიჯი გადადგით?

- დღის წესრიგი არ ჰქონდათ და რაზე უნდა გამართულიყო სესია. მე ბიუროს სხდომაზე საგანგებოდ მივედი, რომ გამერკვია, რა უნდოდა ოპოზიციას, მათ კი პირდაპირ თქვეს, რომ არ ჰქონდათ განსახილველი საკითხი. არც ერთი საკითხი არ დაუსახელებიათ, სხდომა რაზე უნდა ჩატარებულიყო. ძალიან ცუდი სპექტაკლი დადგეს, ფარსი, თითქოს ხელისუფლება უკეტავს კარს სამუშაოდ ოპოზიციას. რა კარის ჩაკეტვაზეა საუბარი, როდესაც იქით ვეპატიჟებით და უარს ამბობენ. ერთად მუშაობაზე უარს ამბობს ხალხი, რომელიც დეპოლარიზაციის ერთგულებაზე იფიცებიან.

- ძალიან ხმაურიანი იყო გოგაშვილის დაკავება მას შემდეგ, რაც თქვა, რომ ხელისუფლების მხილებას აპირებდა. გაჩნდა მოსაზრება, რომ ხელისუფლებას შეეშინდა და ამიტომ დააკავა. ამ კვირაშივე გამოქვეყნდა მისი მასალების საფუძველზე კვლევა, რაც კითხვებს აჩენს არჩევნების სამართლიანობის შესახებ.

- ვითომ მასალების გავრცელება ახალი არ არის. კაცმა არ იცის, ეს მართალია თუ არა, დამაჯერებლობის რაღაც ტესტებიც უნდა ჰქონდეს. თუ ჩათვლიან, რომ დამაჯერებლობის რაღაც ტესტს აკმაყოფილებს, კონკრეტული რეაგირება უნდა მოჰყვეს.

რუსა მაჩაიძე