პრეზიდენტი, პრემიერი და ხელისუფლების სხვა წარმომადგენლები გუდაურში ტრაგიკულად გარდაცვლილთა პანაშვიდზე მივიდნენ
გუდაურში, ვერტმფრენის ჩამოვარდნის შედეგად დაღუპულთა ხსოვნის მოსახსენიებელ სამოქალაქო პანაშვიდზე საქართველოს პრეზიდენტი სალომე ზურაბიშვილი, პრემიერ-მინისტრი ირაკლი ღარიბაშვილი, მინისტრთა კაბინეტის წევრები, თბილისის მერი კახა კალაძე და სხვა პოლიტიკოსები მივიდნენ. საზოგადოებამ უკანასკნელ გზაზე გააცილა გუდაურში, ვერტმფრენის ჩამოვარდნის შედეგად დაღუპული 8 ადამიანი - ეკიპაჟის წევრები: ზაზა ლორია, ანდრო ქუჯოშვილი, ლევან ჩოხელი, დიმიტრი ქააძე; შინაგან საქმეთა სამინისტროს საგანგებო სიტუაციების მართვის სამსახურის მაშველები: გიორგი მარგიანი და კახა ტორჩინავა; ჯანდაცვის სამინისტროს საგანგებო სიტუაციების კოორდინაციისა და გადაუდებელი დახმარების ცენტრის ექიმები: ქეთევან გულაღაშვილი და გიორგი ვენეცკი.
სამების საკათედრო ტაძარში სამოქალაქო პანაშვიდი დილიდან მიმდინარეობდა
ადგილზე შინაგან საქმეთა სამინისტროს საგანგებო სიტუაციების მართვის სამსახურისა და ჯანდაცვის სამინისტროს თანამშრომლები, ასევე რიგითი მოქალაქეებიც იმყოფებოდნენ. მათ დაღუპულები გაიხსენეს და აღნიშნეს, რომ თითოეული მათგანი გმირია.
გარდაცვლილები სამების საკათედრო ტაძრიდან გამოასვენეს და თავიანთ საგვარეულო სასაფლაოზე დაკრძალეს.