14 წელი აგვისტოს ომიდან - ტრაგიკული მოვლენების ქრონოლოგია, რომელიც შესაძლოა, აღარ გვახსოვს
რუსეთ-საქართველოს 2008 წლის აგვისტოს ომიდან 14 წელი გავიდა... ხუთდღიანმა ომმა 408 ადამიანი იმსხვერპლა: 170 სამხედრო მოსამსახურე, შინაგან საქმეთა სამინისტროს 14 თანამშრომელი და 224 მშვიდობიანი მოქალაქე.
ერთად გადავავლოთ თვალი ტრაგიკული დღეების ქრონოლოგიას პირველი აგვისტოდან 16 აგვისტოს ჩათვლით - ომის დღეებს, რომელიც ბევრად უფრო ადრე დაიწყო და რომელმაც საქართველოს მომავალი მთლიანად შეცვალა.
1-ლი აგვისტო
ერედვი-ხეითის შემოვლით გზაზე აფეთქდა საქართველოს შსს-ს კუთვნილი ავტომანქანა, ინტენსიური, ორმხრივი სროლა დაიწყო საქართველოს თავდაცვის ქვედანაყოფებსა და ე. წ. სამხრეთ ოსეთის შეიარაღებულ ძალებს შორის, დაიღუპა 6 და დაიჭრა 21 ადამიანი.
2 აგვისტო
მთელი ღამის განმავლობაში იბომბებოდა ქართული სოფლები: ქვემო და ზემო ნიქოზი, ავნევი, ერედვი, ერგნეთი. სახელმწიფო მინისტრი რეინტეგრაციის საკითხებში თემურ იაკობაშვილი რუსეთის სამშვიდობო ძალების ხელმძღვანელს, მარატ კულახმეტოვს ხვდება. იაკობაშვილი ოს სეპარატისტებთან შეხვედრასაც ითხოვს, მაგრამ უარს იღებს.
3 აგვისტო
ცხინვალიდან რუსეთში ევაკუირებულ იქნა ადგილობრივი მოსახლეობა – ბავშვები და ქალები. ვლადიკავკაზში ე. წ. სამხრეთ ოსეთის მხარდამჭერი მიტინგი იმართება. ამ დღეს აფხაზი სეპარატისტები იღებენ გადაწყვეტილებას სექტემბრიდან გალში ქართულ ენაზე სწავლების აკრძალვის შესახებ. სერგეი ბაღაფში საგანგებო მდგომარეობას აცხადებს და ენგურის ხიდს კეტავს. როკის გვირაბიდან რუსეთის 58-ე არმიის ხუთი ბატალიონი, ჯავშანტექნიკა და არტილერია შემოდის.
4 აგვისტოს
სეპარატისტთა ლიდერი ედუარდ კოკოითი აცხადებს, რომ რუსეთის გარეშე საქართველოსთან მოლაპარაკებას არ გამართავს. სეპარატისტთა ე. წ. შს მინისტრი მიხეილ მინძაევი აცხადებს, რომ ცხინვალი მზად არის ცეცხლის გასახსნელად. კონფლიქტის ზონაში მდგარი რუსული ბატალიონი საგანგებო მდგომარეობაზე გადადის.
5 აგვისტო
ისევ დაცხრილეს ქართული სოფლები. აფხაზი სეპარატისტები მეორე ფრონტის გახსნაზე იწყებენ ლაპარაკს. სამხრეთ რუსეთიდან მოხალისეთა ნაკადი მოედინება. განცხადებას ავრცელებს ეუთო და ვითარების დაძაბვაში სეპარატისტებს ადანაშაულებს.
6 აგვისტო
მსხვილკალიბრიანი არტილერიით მთელი დღე იბომბება ქართული სოფლები: ნული, ავნევი, თამარაშენი... ააფეთქეს ქართული სამშვიდობო ძალების ქვეითთა საბრძოლო მანქანა „ბე-ემ-პე“. ქართული სოფლები კვლავ იცხრილება. არის მსხვერპლი. ქართულმა მხარემ რეგიონის საზღვართან ტანკები, ჯარი და არტილერია განალაგა და სროლითვე პასუხობს მოწინააღმდეგეს.
რუსეთის საგარეო საქმეთა სამინისტროში, საგანგებო თათბირის შემდეგ, თბილისში გზავნიან იური პოპოვს, რომლის განცხადებითაც, იაკობაშვილისა და ჩოჩიევის შეხვედრა რუსული მხარის ხელშეწყობით გაიმართება, ხოლო რეგიონში მოვლენათა ძალისმიერი გზით განვითარების შემთხვევაში რუსეთი განზე ვერ დარჩება. ოსმა სეპარატისტებმა 7 აგვისტოს ცხინვალში დაგეგმილი შეხვედრა გადადეს და ქართულ მხარეს შეხვედრა 9 აგვისტოს შესთავაზეს.
7 აგვისტო
ქართულ სოფლებზე თავდასხმა გახშირდა - სეპარატისტები განუწყვეტლივ ბომბავენ ქართულ სოფლებს.
საქართველოს პრეზიდენტი საგანგებო განცხადებას აკეთებს, რომ ქართული მხარე მაქსიმალური თავშეკავების გამოჩენისთვის მზად არის... საქართველოს საგარეო უწყება კი მოუწოდებს რუსეთს, გამოიყენოს თავისი ზეგავლენა სეპარატისტებზე და მშვიდობიანი მოსახლეობის დაბომბვა აღკვეთოს...
კონფლიქტის ზონაში სნაიპერული ომი მიმდინარეობს სოფლის მცხოვრებთა წინააღმდეგ, ინტენსიურად ისვრიან არტილერია, ტანკები და ხელსატყორცნი არტილერიული სისტემები, რომლებიც კონფლიქტის ზონაში არალეგალურად არის შემოტანილი - აცხადებს სააკაშვილიის მხარეებს ნებისმიერი ფორმატის მოლაპარაკებისკენ მოუწოდებს - პირობა, სამხრეთ ოსეთისთვის სრული ავტონომიის მინიჭებისა, ძალაში რჩება... სააკაშვილი კიდევ ერთხელ სთავაზობს რუსეთის ფედერაციას შუამავლობას კონფლიქტის მოგვარებაში. ოსურმა მხარემ ცეცხლი დროებით შეწყვიტა, მაგრამ მალე ცეცხლის შეწყვეტის შესახებ შეთანხმება დაარღვია და კვლავ შეუტია ქართულ სოფლებს...
23:30 საათზე ცხინვალის რეგიონში კონსტიტუციური წესრიგის დასამყარებლად, სააკაშვილის ბრძანებით, ქართული მხარე საბრძოლო მოქმედებებს იწყებს... ქართული მხარის საბრძოლო მოქმედებების დაწყებამდე რუსეთის 58-ე არმია როკის გვირაბით ე.წ. სამხრეთ ოსეთის ტერიტორიაზე შემოდის. გააგრძელეთ კითხვა