ვიტალი კლიჩკოს ყოფილი მეუღლის პირველი კომენტარი განქორწინების შემდეგ
ორი დღის წინ, ცნობილი გახდა, რომ კიევის მერი ვიტალი კლიჩკო 25 - წლიანი ქორწინების შემდეგ, ცოლს ნატალია კლიჩკოს დაშორდა. პოლიტიკოსმა მედიასთან საუბრისას ამ ნაბიჯს გააზრებული უწოდა და აღნიშნა, რომ ისინი მეგობრებად დარჩნენ. კლიჩკოს მეუღლე წლებია, რაც სამ შვილთან ერთად გერმანიაში ცხოვრობს, სადაც მუსიკალური კარიერის გაკეთებას ცდილობს.
ნატალია კლიჩკომ კიევის მერთან, ვიტალი კლიჩკოსთან განქორწინების შესახებ პირველი კომენტარი "ინსტაგრამის" საკუთარ გვერდზე გააკეთა და დაშორების მიეზეზებზე ისაუბრა.
ნატალია კლიჩკო:
"მადლობელი ვარ ყველაფრისთვის, რაც მოხდა ჩვენი ცხოვრების გზაზე 25 - წლიანი მოგზაურობის დროს. ჩვენი განქორწინება არის გააზრებული, ორმხრივად შეთანხმებული გადაწყვეტილება. მოხდა ისე, რომ სხვადასხვა ქვეყანაში ცხოვრების მრავალი წლის განმავლობაში, ჩვენი ცხოვრების გზები თანდათან დაშორდა ერთმანეთს.
ჩვენ გავზარდეთ 3 საოცარი შვილი და სამუდამოდ ვრჩებით მათ მშობლებად. როგორც ადრე, ახლაც გვაქვს მეგობრული ურთიერთობა და ერთმანეთის სრული პატივისცემა. ჩვენ ყოველთვის მხარს ვუჭერდით ერთმანეთს და ასე გავაგრძელებთ ნებისმიერ ვითარებაში... ვიტალის მხოლოდ საუკეთესოს ვუსურვებ...
"ცხოვრების ახალი თავი" იწყება..."
ვიტალი და ნატალია კლიჩკო 1997 წლის 26 აპრილს დაქორწინდნენ. წყვილს სამი შვილი შეეძინა: 2000 წელს - ვაჟი იგორ-დანიელი, 2002 წელს - ქალიშვილი ელიზავეტა-ვიქტორია, 2005 წელს - მაქსიმი. ნატალია წლებია გერმანიაში ცხოვრობს, ბავშვებიც საზღვარგარეთ სწავლობენ.