პრემიერის ბრძანებით, ბორჯომის ტყეში ხანძრის ჩაქრობის პროცესში თავდაცვის ძალები ჩაერთნენ - ადგილზე ჩავიდა თავდაცვის მინისტრიც
საქართველოს პრემიერ-მინისტრ ირაკლი ღარიბაშვილის ბრძანებით, ბორჯომის მუნიციპალიტეტში ბუნებრივი კატასტროფის თავიდან აცილების მიზნით და ხანძარსაწინააღმდეგო მოქმედებების ეფექტიანად განსახორციელებლად, პროცესში თავდაცვის ძალები ჩაერთნენ. საქართველოს თავდაცვის ძალების გამოყენების შესახებ მთავრობის მეთაურმა შესაბამის ბრძანებას ხელი მოაწერა.
ვითარების გასაცობად ადგილზე ჩავიდა თავდაცვის მინისტრი ჯუანშერ ბურჭულაძე.
ადგილზე ასევე იმყოფება სამცხე-ჯავახეთის მხარის სახელმწიფო რწმუნებული ბესიკ ამირანაშვილი.
ბორჯომის მუნიციპალიტეტის სოფელ ქვაბისხევის მიმდებარე ტყეში გაჩენილ ხანძარს 250-მდე მეხანძრე-მაშველი ებრძვის. ადგილზე მობილიზებულია სასაზღვრო პოლიციის 3 ვერტმფრენი. სამუშაოებს ძლიერი ქარი და რთული კლდოვანი რელიეფი ართულებს.
ბორჯომში ტყის მასივში ხანძარი გუშინ გაჩნდა.