"შევხვდებით მანდ, რამე კარგ სიხშირეზე..." - დიჯეი "დინჯი" 50 წლის ასაკში გარდაიცვალა
1990-იანი წლების, თბილისში პოპულარული რადიოს - "რადიო 105"-ის ერთგულ მსმენელებს კარგად ახსოვთ გამორჩეული ხმის ტემბრის მქონე დიჯეი - "დინჯი"...
რადიო და საკლუბო დიჯეი არჩილ ბუბუტეიშვილი "რადიო 105"-ში 1990-იანი წლების ბოლოს მუშაობდა, გარკვეული პერიოდი კი - რადიო "პალიტრაში" და სხვა ორგანიზაციებში.
ბოლო პერიოდში, იგი მძიმე სენს ებრძოდა და 50 წლის ასაკში გარდაიცვალა...
ამის შესახებ ინფორმაციას სოციალურ ქსელში მისი მეგობარი - ნიკა რამიშვილი - "დრუპი" ავრცელებს:
"დინჯი წავიდა... ჩემი ძმა!... შევხვდებით მანდ, რამე კარგ სიხშირეზე... ჩემს მოსვლამდე რასაც დაითრევ...
დროებით, დინჯო! მიყვარხარ!...", - წერს იგი.
"კვირის პალიტრის" რედაქცია მწუხარებას გამოთქვამს და უსამძიმრებს "დინჯის" ოჯასა და ახლობელებს...
დიჯეი "დინჯის" ambebi.ge-სთან მეგობრები იხსენებენ
ნიკა რამიშვილი, "დრუპი", ტელე-რადიოწამყვანი:
- მე და "დინჯი" "რადიო 105“-დან ერთად მოვდივართ. "105“-ის მერეც, როცა ჯგუფი დაიშალა, სხვადასხვა სამსახური გვქონდა, მაგრამ მაინც სულ ერთად ვიყავით. ახლაც ახალ რადიოზე ვმუშაობდით, რაშიც "დინჯი" შინიდან, როგორც შეეძლო, გვეხმარებოდა, ტექნიკურ კონსულტაციებს გვიწევდა.
სიმსივნე ჰქონდა, მაგრამ ეს სიმსივნეც ხომ მარცხდება. ამიტომ ოპტიმისტურად იყო განწყობილი, თან გურული, გადარეული კაცი იმედიანად იყო/ მოკლედ, გვეგონა, რომ მოერეოდა... ამის მერე თუ ამ სფეროში რამეს გავაკეთებ, ყველაფერს "დინჯის მივუძღვნი... ტელევიზიაშიც ვმუშაობ, მაგრამ რადიო ჩემი საყვარელი სფერო და საქმეა. აქამდე რადიოში "დინჯის" გარეშე ნაბიჯი არ გადამიდგამს. ამიტომ, მის სახელზე რაღაც კარგი მინდა, რომ გავაკეთო...
ზაალ წულუკიძე, ტელე-რადიოწამყვანი:
- ძალიან მხნედ იყო, მაგრამ... ბოლოს რომ მივწერე და მოვიკითხე, რამდენიმე დღე არ მიპასუხა. მერე ხმოვანი შეტყობინება გამომიგზავნა. ცოტა ტკივილი მაქვს, ვერ ვწერ და მირჩევნია, ასე შეგეხმიანოო. ხმაც შეცვლილი ჰქონდა, არ იყო იმ დიჯეი "დინჯის" ხმა, რომელიც ყველამ ვიცით...
თინეიჯერობაში მისი ეთერების მოსმენამ მიბიძგა, რომ რადიოში დამეწყო მუშაობა. საქმისადმი დამოკიდებულება, მსმენელებისად მიმიმართვა, პატივისცემა, - ეს მართლა გამოარჩევდა მას. მიმაჩნია, რომ არჩილ ბუბუტეიშვილი იყო საზოგადო მოღვაწე. თუკი არის ღირსეული, გამოჩენილი ადამიანების ახალი პანთეონი, სადაც ისინი იკრძალებიან, პირადად ჩემი, ერთ-ერთი მოქალაქის, ზაალ წულუკიძის აზრია, "დინჯი" იმ პანთეონში დაიკრძალოს და მიეგოს შესაბამისი პატივი. გააგრძელეთ კითხვა