"რუსეთის ტერორიზმის სპონსორ სახელმწიფოდ აღიარება არ არის საუკეთესო გზა იმისთვის, რომ რუსეთისთვის პასუხისმგებლობის დაკისრება გაგრძელდეს"
აშშ-ის ეროვნული უსაფრთხოების საბჭოს პრესსპიკერის ჯონ კირბის განცხადებით, აშშ-ის მთავრობა არ გეგმავს, რუსეთი ტერორიზმის სპონსორ სახელმწიფოდ აღიაროს.
„მიგვაჩნია, რომ ეს არ არის საუკეთესო და ყველაზე ეფექტური გზა იმ მიზნით, რომ რუსეთისთვის პასუხისმგებლობის დაკისრება გაგრძელდეს“, - განუცხადა კირბიმ ჟურნალისტებს.
მისივე განმარტებით, ტერორიზმის მხარდამჭერ ქვეყნად აღიარებამ შეიძლება უარყოფითად იმოქმედოს უკრაინის პოზიციაზე მოლაპარაკებების მაგიდასთან, თუკი რუსეთთან მოლაპარაკებები განახლდება.
შეგახსენებთ, მანამდე აშშ-ის პრეზიდენტმა ჯო ბაიდენმა განაცხადა, რომ მისი ადმინისტრაცია რუსეთის ტერორიზმის სპონსორ სახელმწიფოდ აღიარებას არ გეგმავს. ტერორიზმის სპონსორ სახელმწიფოებად აშშ–ის მიერ აღიარებულია კუბა, ირანი, სირია და ჩრდილოეთ კორეა.