"სავარაუდოა, რომ ამინი ირანის მორალის პოლიციამ სცემა. მისი სიკვდილი მიუტევებელია" - შემზარავი ამბის შემდეგ მსოფლიოში ირანელ ქალთა მხარდასაჭერი კამპანია სულ უფრო აქტიურდება

უკვე რამდენიმე დღეა, ირანის ქუჩები საპროტესტო აქციებმა მოიცვა. მოსახლეობა პროტესტს უცხადებს პოლიციას, სამედიცინო სექტორს და მთავრობას, რომელმაც 22 წლის გოგო სასიკვდილოდ გაიმეტა. სოციალური ქსელი აჭრელებულია, აქტივისტები ახალგაზრდა მაჰსა ამინის სიკვდილს სხვადასხვა გზებით აპროტესტებენ, კიდევ ერთი უდანაშაულო ადამიანი შეეწირა სისტემას, რომელიც ქალებისთვის დღითიდღე უფრო მკაცრი და დაუნდობელი ხდება. რამდენიმე დღის წინ, ირანის ნახევრად ოფიციალურმა მედიამ, Etemad Online შემზარავი ამბავი გაავრცელა. მედიამ დაწერა, რომ ირანში მორალისა და ზნეობის პოლიციამ 22 წლის გოგო, მაჰსა ამინი ჰიჯაბის არასწორად ტარებისთვის დააკავა. პოლიციამ მაჰსა განყოფილებაში გადაიყვანა, თუმცა მოულოდნელად აღმოჩდა, რომ დაკავებული გოგონა კომურ მდგომარეობაში საავადმყოფოში მიიყვანეს, მაჰსა ადგილზე გარდაიცვალა. ირანის პრეზიდენტმა ებრაჰიმ რაისიმ გოგონას გარდაცვალებასთან დაკავშირებით გამოძიების დაწყების ბრძანება გასცა. სამშაბათს საღამოს, მაჰსა ამინი და მისი ოჯახის წევრები, ირანიდან თეირანში ნათესავების სანახავად მიდიოდნენ. მოულოდნელად ავტომობილი მორალის პოლიციამ გააჩერა. მორალის პოლიცია ქვეყანაში ჩაცმულობას, ქალების კოდექსს და სამოსის ტარების წესებს არეგულირებს. IranWire-ის ცნობით, უფლებადამცველებმა გოგონა ავტომობილიდან გადმოიყვანეს, ჰიჯაბის არასწორად ტარების გამო ძალდატანებით პოლიციის ავტომობილში ჩასვეს და განყოფილებისკენ წაიყვანეს. მეჰსას ძმამ კიარაშმა პოლიციასთან გასაუბრება სცადა, თუმცა უფლებადამცელებმა ოჯახი დაამშვიდა და უთხრეს, რომ გოგონას განყოფილებაში ერთი საათით დატოვებდნენ. უცხოური მედია ამბის გაგრძელების სხვადასხვა ვერსიას ავრცელებს. ადგილობრივი თვითვმხილველები ამბობენ, რომ პოლიციის მანქანაში მეჰსა სცემეს და შემდეგ წაიყვანეს ის განყოფილებაში. ინციდენტიდან რამდენიმე საათში მეჰსას ოჯახი განყოფილებასთან მივიდა, ისინი გოგონას გამოშვებას ეზოში ელოდნენ. მოულოდნელად ეზოში სასწრაფო დახმარების მანქანა მივიდა, ექიმებმა საკაცეზე დაწვენილი გოგონა გამოიყვანეს. კიარაშას თქმით, ოჯახს მისი და გაღვიძებული აღარ უნახავს. ხუთშაბათს თეირანის პოლიციამ განცხადება გააკეთა. მათი თქმით, გოგონას განყოფილებაში უეცარი გულის შეტევა დაემართა. ”გოგონა გაგზავნეს დიდი თეირანის პოლიციის განყოფილებაში, როდესაც მოულოდნელად, სხვა ადამიანების თანდასწრებით, მას გულის შეტევა დაემართა,” - ინფორმაციას პოლიცია ავრცელებს. ამინის ოჯახმა პოლიციის ვერსია არ დაიჯერა, ოჯახი ამტკიცებს რომ გოგონა სრულიად ჯანმრთელი იყო და მას წინასწარ არსებული რამე გულის დაავადება არასდროს ჰქონია. &bdquo;მისი დაკავებისა და საავადმყოფოში გადაყვანის შემდეგ მხოლოდ ორი საათი იყო გასული“, - განუცხადა კიარაშმა IranWire-ს. ირანის პოლიციამ განცხადების დასადასტურებლად მცირე ვიდეორგოლი გაავრცელა, სადაც ჩანს, რომ 22 წლის გოგო კამერისკენ ზურგით დგას და ექსპერტს ესაუბრება, ექსპერტი მას ტანსაცმელზე ეხება, შემდეგ კი გოგო უგონოდ ვარდება ძირს. ვიდეო ფანჯარასთან არის გადაღებული და ცხადად ჩანს, რომ გარეთ დღეა. რამდენიმე წუთში, ვიდეოში 8 მამაკაცი შემოდის, მათ გოგონა საკაცით გარეთ გამოჰყავთ, გარეთ უკვე ბნელა. ეს გარემოებები საზოგადოებასა და მედიაში ეჭვს აჩენს. ჯერჯერობით უცნობია, რა ბედი ეწია დაკავების შემდეგ მაჰსას, თუმცა მედიასაშუალებები წერენ, რომ გოგონა ძლიერი ცემისგან გარდაიცვალა, CNN ვერ ადასტურებს, რომ ვიდეოში გამოსახული გოგო ამინია. ირანის ოფიციალურმა პირებმა შაბათს განაცხადეს, რომ მათ ამინის ცხედრის გაკვეთა ჩაატარეს. სახელმწიფო ტელევიზიით საუბრისას, ირანის სასამართლო სამედიცინო ორგანიზაციის დირექტორმა, მეჰდი ფოროზეშმა განაცხადა, რომ შედეგები გამოქვეყნდება სამედიცინო ექსპერტების შემდგომი შემოწმების შემდეგ. ამინის საავამდყოფოში გადაყვანის შემდეგ ის რამდენიმესაათიანი კომის შემდეგ გარდაიცვალა. ჯეიკ სალივანმა, აშშ-ის პრეზიდენტის - ჯო ბაიდენის მრჩეველმა ეროვნული უსაფრთხოების საკითხებში, პარასკევს ტვიტერში დაწერა, რომ თეთრი სახლი ღრმად შეშფოთებულია ამინის სიკვდილით. &bdquo;სავარაუდოა, რომ ამინი სცემა ირანის მორალის პოლიციამ. მისი სიკვდილი მიუტევებელია. ჩვენ გავაგრძელებთ ირანელი ოფიციალური პირების საკითხზე რეაგირებას ადამიანის უფლებების ასეთ დარღვევაზე“, - დაწერა სალივანმა ტვიტერზე. შემზარავი ამბავი ირანიდან მსოფლიოს უკვე მოედო. აქტივისტები და გოგონას მხარდამჭერები მორალის პოლიციის მიერ ქალებზე ძალადობის ამსხველ სხვა კადრებს ავრცელებენ. სამწუხაროდ, ეს პირველი შემთხვევა არ არის და ირანში ქალთა უფლებები ისევ ირღვევა. (წყარო) (სპეციალურად საიტისთვის)