"გავუფრთხილდეთ ჩვენს ბავშვებს" - პაატა ბურჭულაძემ 13 წლის მარიტა მეფარიშვილის ოჯახს მიუსამძიმრა - კვირის პალიტრა

ვაკის სამების ეკლესიაში, სადაც 13 წლის მარიტა მეფარიშვილის პანაშვიდი მიმდინარეობს, ოპერის მომღერალი პაატა ბურჭულაძე მივიდა. მან გარდაცვლილი მოზარდის ოჯახს მიუსამძიმრა.

“ერთი რამ მინდა ვთქვა, რომ გავუფრთხილდეთ ჩვენს ბავშვებს. ახლა ისეთი დროა, რომ ეს აუცილებლად უნდა გავითვალისწინოთ - გავუფრთხილდეთ ერთმანეთს”,- განაცხადა ბურჭულაძემ ჟურნალისტებთან საუბრისას.

ცნობისთვის, ვაკის სამების ეკლესიაში მარიტა მეფარიშვილის სამოქალაქო პანაშვიდი მიმდინარეობს. მას 14:00 საათზე კორტებზე გადაასვენებენ, 15:00 საათზე კი დაკრძალავენ.

შეგახსენებთ, რომ მიმდინარე წლის 13 ოქტომბერს, ვაკის პარკში, შადრევანში სამი ბავშვი ბურთის ამოსატანად ჩავიდა, რა დროსაც მათ დენმა დაარტყა. ბავშვები კლინიკაში სასწრაფო დახმარების ბრიგადამ გადაიყვანა. ერთ-ერთი ბავშვის, 13 წლის გოგონას, მარიტა მეფარიშვილის მდგომარეობა თავიდანვე მძიმე იყო და ის ხეჩინაშვილის კლინიკაში გარდაიცვალა.

შსს-ს განმარტებით, მომხდარ ფაქტზე დაუყოვნებლივ დაიწყო გამოძიება საქართველოს სისხლის სამართლის კოდექსის 240-ე პრიმა მუხლის პირველი ნაწილით. გამოძიების მსვლელობისას დაზუსტდა კვალიფიკაცია და გამოძიება გრძელდება სისხლის სამართლის კოდექსის 240-ე პრიმა მუხლის პირველი და მეორე ნაწილებით, რაც გულისხმობს ელექტრო ობიექტზე უსაფრთხოების წესების დარღვევას, რასაც მოჰყვა ადამიანის სიცოცხლის მოსპობა. დანაშაული 4-დან 7 წლამდე ვადით თავისუფლების აღკვეთას ითვალისწინებს.