კრემლის პროპაგანდისტი ჟურნალისტი ოკუპირებულ ყირიმში, სამხედრო-სპორტული სროლისას დაიღუპა
კრემლის პროპაგანდისტი, Russia today-ს სიმფეროპოლის ბიუროს ხელმძღვანელი სვეტლანა ბაბაევა ოკუპირებულ ყირიმში, ერთ-ერთ სასწავლო-სავარჯიშო პოლიგონზე დაიღუპა.
რუსული მედიის ინფორმაციით, ის სამხედრო-სპორტული სროლისას, "ბრმა ტყვიას“ ემსხვერპლა.
ეს ინფორმაცია დაადასტურა მისმა უშუალო ხელმძღვანელმა დმიტრი კისელევმა.
"კომერსანტის“ თანამშრომლების თქმით, წინასწარი ინფორმაციით, სწავლებაში მონაწილეების მხრიდან უსაფრთხოების ზომების დარღვევის შედეგად ჟურნალისტი ცეცხლის ხაზში აღმოჩნდა.
ბაბაევას გარდაცვალებას გამოეხმაურა კიდევ ერთი პროპაგანდისტი მარგარიტა სიმონიანი. "ჯერ კიდევ გუშინ ვმსჯელობდით, თუ როგორ განვვითარდებოდით ახალ ტერიტორიებზე. ოხ, სვეტა, სვეტა, ეს როგორ მოხდა..." - დაწერა სიმონიანმა.
სვეტლანა ბაბაევა 2019 წლიდან ხელმძღვანელობდა Russia today-ს სიმფეროპოლის განყოფილებას. 2008 წლიდან 2012 წლამდე იყო RIA Novosti-ის ბიუროს მთავარი რედაქტორი აშშ-ში, ხოლო 2013 წლიდან 2016 წლამდე იყო Gazeta.Ru-ს მთავარი რედაქტორი.