"გულწრფელად ვნანობ! მეტი, არ ვიცი, რა გავაკეთო? მე მაპატიეთ!“ - მსახიობი თამარ მაყაშვილი დისკრიმინაციული ნათქვამის გამო ბოდიშს იხდის
"გულწრფელად ვნანობ! მეტი, არ ვიცი, რა გავაკეთო? მე მაპატიეთ!“ - მსახიობმა თამარ მაყაშვილმა ბოდიშის მოხდა მას შემდეგ გადაწყვიტა, რაც ორი დღის წინ, "იმედზე“ ერთ-ერთ გადაცემაში "ხულელი ბავშვი“ დამკნინებელ კონტექსტში მოიხსენია. ყველაფერი კი იმით დაიწყო, რომ რუსკა მაყაშვილი "რუსთავი 2"-ის დატოვების შემდეგ, "იმედზე" შაბათ-კვირის გადაცემაში წამყვნად დაიწყო მუშაობა. ერთ-ერთ პირველ სტუმრად კი საკუთარი დედა, თამარ მაყაშვილი მიიწვია.
გადაცემაში მაყაშვილი ყვება, რომ მკაცრი დედა იყო და ყოველთვის აკონტროლებდა შვილების ჩაცმულობას.
"არასოდეს ვაცმევდი სულელურ კაბებს. იმ დღეს გავიხედე და კატოს (რუსკას შვილი) არ აცვია ხულელი ბავშვივით, საშინელი ბეშუმური კაბა. კინაღამ გული გამისკდა, ბავშვს რა ჩააცვი-მეთქი და გავერთეო... “ - ამბობს მაყაშვილი. მსახიობის ამ ნათქვამს სერიოზული გამოხმაურება მოჰყვა სოციალურ ქსელში. საპროტესტო განცახდება გაავრცელა "ფეისბუქში" ხულოს გვერდმაც....
"ხულელი ბავშვივით, საშინელი ბეშუმური კაბა" - თამარ მაყაშვილის სამარცხვინო და დამცინავი განცხადება. სამწუხაროა, რომ გადაცემის წამყვანებიც ამ დისკრიმინაციულ "ხუმრობაზე" იცინიან. TV Imedi მოიხადეთ ბოდიში!“ - წერია პოსტში...
საზოგადოების რეაქციების შემდეგ მაყაშვილმა სოციალურ ქსელში რამდენიმე ბოდიშის ტექსტი გამოაქვეყნა...
"მე მაპატიეთ, თუკი ვინმეს უნებურად გაწყენინეთ! ნამდვილად არ მახასიათებს! ძალიან მაწუხებს არაწორად ნათქვამი და გაგებული! ღმერთი-რჯული, არც გამივლია გულში მსგავსი რამ!.. არასწორი სიტყვათა თანწყობამ გამოიწვია ეს. მეც უამრავი ბავშვის პატრონი ვარ და ყველა კუთხის ბავშვებს ვუდგავარ გვერდში უანგაროდ. გულწრფელად ვნანობ! მეტი არ ვიცი რა გავაკეთო? მე მაპატიეთ! აღარ გავიმართლებ თავს, რადგან ჩემი ჩანაწერი-მიმართვა გულწრფელი არ გგონიათ! შევცდი ბატონო! ვაღიარებ!
პ.ს მაინც ვიტყვი, რომ მიყვარხართ! ასეა ეს! არ მაქვს უნარი, შევწყვიტო ადამიანების და მითუმეტეს ბავშვებისადმი სიყვარული! მიყვარს და მეყვარება ყველა ერის, რჯულის და რასის!" - წერს მაყაშვილი.