პუტინთან თათბირის დროს მინისტრებს შუქი გაუთიშეს - რა მოხდა მოსკოვის ცენტრში?
მედიაში გავრცელებული ინფორმაციით, "მოსკოვი-სიტის" რამდენიმე ცათამბჯენში, სადაც რუსი მაღალჩინოსნები ცხოვრობენ და, პარალელურად, სამინისტროებიცაა განთავსებული, გასულ ხუთშაბათს შუქი ჩაქრა. როგორც ცნობილია, ამ დროს მინისტრები სწორედ იმ თათბირს ესწრებოდნენ, რომელსაც ქვეყნის პრეზიდენტი ვლადიმერ პუტინი ხელმძღვანელობდა.
РБК-ს ცნობით, ელექტროენერგიის მიწოდება შეწყდა კომპლექს "IQ-квартал"-ში, სადაც რამდენიმე სამინისტროა განთავსებული, მათ შორის - ეკონომიკის სამინისტრო.
გავრცელებულ ვიდეოში ჩანს, რომ ეკონომიკისა და ვაჭრობის მინისტრი მაქსიმ რეშეტნიკოვი და დენის მანტუსოვი ბნელ ოთახში სხედან.
რეშეტნიკოვს სიტყვა მხოლოდ მაშინ მისცეს, როცა მის კაბინეტში შუქი ისევ მოვიდა, თუმცა ამ ინციდენტს პუტინი არ შეუფერხებია.
„ვიმედოვნებ, ის სარემონტო სამუშაოები, რომელიც კომპლექსში მიმდინარეობს, არ შეგიშლით ხელს ანგარიშის წარდგენაში“, - მიმართა პუტინმა მინისტრს.
პირდაპირი ეთერის დროს გამოჩნდა, რომ უცნობი პირი პუტინთან მივიდა და ჩუმად რაღაც უთხრა.
საგანგებო სიტუაციების სამსახურის განცხადებით, "მოსკოვი-სიტიში" 18:10 საათზე სახანძრო სიგნალიზაცია ამოქმედდა, თუმცა მეხანძრეებმა ხანძრის კერა ვერსად იპოვეს.
„ლიფტები გაიჭედა და ხალხი კარს დამოუკიდებლად აღებდა, მოსახლეობის უმეტესი ნაწილი უკვე სახლშია“, - განუცხადეს გამოცემა ТАСС-ს.
„IQ-квартал“-ი მრავალფუნქციური კომპლექსია, რომელიც "მოსკოვი-სიტის" ცენტრში მდებარეობს და სამ - 22, 33 და 42-სართულიან ცათამბჯენს მოიცავს.
ამ კომპლექსში შედის ე.წ. მინისტრთა კოშკი, სადაც ეკონომიკის სამინისტროს მე-17-29 სართულები უკავია, ვაჭრობის სამინისტროს - მე-30-36 სართულები, ციფრული განვითარების სამინისტროს - მე-10-12 და მე-14-15 სართულები.
როგორც ცნობილია, ამ შენობაში სამინისტროები 2019 წლის მარტში გადმოიტანეს. ბევრ სახელმწიფო მოხელეს ეს ცვლილება არ მოეწონა. გამოცემა The Bell-თან ინტერვიუში ერთ-ერთმა თანამშრომელმა თქვა:
„შენობა მართლაც ლამაზი და მოდურია, თუმცა პირადი სივრცე - დარღვეულია".