"ჩვენი პარტიის წევრები ფიქრობენ, რომ დღეს ვართ "ნაციონალური უძრაობა" და არა "ნაციონალური მოძრაობა"
ქართული ოცნების“ პიარის ნაწილია ის, რომ თურმე ძმები ახალაიები მელიას უკან დგანან და კეზერაშვილი მეორე გუნდის უკან დგას, თურმე ბრძოლა მიდის კლანებს შორის - მე პირადად, კეზერაშვილს არ ვიცნობ,- ამის შესახებ თბილისის საკრებულოში „ნაციონალური მოძრაობის” წევრმა, ირაკლი ნადირაძემ „პალიტრანიუსის“ გადაცემა „პოლიტ-ქალაქში“ განაცხადა.
როგორც ნადირაძე აღნიშნავს, იმ ლიდერებს, ვინც ბიძინა ივანიშვილს ებრძვის, არავის დახმარება არ სჭირდება, რათა შიდა პარტიული გაძლიერებისთვის იბრძოლონ.
„ვნახე, რომ მელიას უკან ძმები ახალაიები დგანან თურმე, ხოლო მეორე მხარეს კეზერაშვილია. ამ ლიდერებს, ვინც ბიძინა ივანიშვილს ებრძვის, არავის დახმარება არ სჭირდება, რომ შიდა პარტიული გაძლიერებისთვის იბრძოლონ. ვიღაცა ვიღაცას თუ იცნობს, ეს არის ყოფილი სახელისუფლებო პარტია და შეიძლება ამ ადამიანებთან კონტაქტები არსებობდეს, არც მალავენ. მე პირადად კეზერაშვილს არ ვიცნობ. ის, რომ ძმები ახალაიები მელიას უკან დგანან, ის, რომ თურმე კეზერაშვილი დგას მეორე გუნდის უკან, ეს მხოლოდ „ქართული ოცნების“ პიარის ნაწილია, რომ თურმე ბრძოლა მიდის კლანებს შორის. როგორც არ უნდა დასრულდეს ეს არჩევნები, ჩვენ გავაგრძელებთ ბრძოლას საერთო მიზნისთვის“,- აღნიშნავს ნადირაძე.
როგორც ნადირაძე განმარტავს, დღეს „ნაციონალურ მოძრაობაში“ ფიქრობენ, რომ პარტია არა „ნაციონალური მოძრაობა“, არამედ „ნაციონალური უძრაობაა“. მისივე თქმით, ფაქტია, რომ რაც იყო დაანონსებული „ცხელი შემოდგომა“ და აქციები არ ყოფილა.
„ჩვენი პარტიის წევრები ფიქრობენ, რომ დღეს ვართ „ნაციონალური უძრაობა“ და არა „ნაციონალური მოძრაობა“. როდესაც პრეტენზიები ისმის, საჭიროა ახალი არჩევნები, ახალი ლეგიტიმაცია. თუ ჩათვლიან, რომ ყველაფერი გავაკეთეთ, მათ შორის, ნიკა მელიაც და ჩვენც, ეს ადამიანი დარჩება. თუ ფიქრობენ, რომ ვიღაცას უკეთესად შეეძლო, მოისმენენ თავმჯდომარეობის კანდიდატების პოზიციას რა შეიძლებოდა გაკეთებულიყო უკეთესად. მე არ მაქვს ეს პრეტენზია, რომ შემეძლო რაღაც უკეთესად გამეკეთებინა...
სააკაშვილი პარტიისთვის პრიორიტეტია. დაგვიძახეს სადმე? აქცია ჩაატარეს? პიკეტი იყო? რამე აქტივობა იყო და მონაწილეობა არ მივიღეთ? როდესაც არაფერი ხდება და უძრაობაში ვართ, ამიტომ ვითხოვთ ცვლილებებს. ხვალ, ზეგ ბიძინა ივანიშვილმა რაიმე გადაწყვეტილება მიიღოს, პარტია ფორმაში უნდა ვიყოთ, რომ ჩვენი მხარდამჭერები მზად იყვნენ გამოსასვლელად. ჩემი აზრით, პარტია არ არის ფორმაში. ფაქტია, რომ რაც იყო დაანონსებული „ცხელი შემოდგომა“, აქციები არ ყოფილა. არ ვიცი მისი{ნიკა მელიას} მოწოდების გამო არ გამოვიდა, თუ საორგანიზაციო საკითხის გამო. ამას ჩვენი ამომრჩევლისთვის მნიშვნელობა არ აქვს. ჩვენი ამომრჩევლისთვის მნიშვნელობა არ აქვს ვის დაძახებულზე არ გამოდის ხალხი, ან ვის გამო არ არის პარტია აქტიური. ამომრჩევლისთვის მნიშვნელოვანია პარტია აქტიური უნდა იყოს“,- აღნიშნავს ნადირაძე.
IPN