"მე არასოდეს მინახავს ეს არსად მსოფლიოში. ბედნიერი ვარ, რომ ჩემი შვილი ამ ზეიმისა და ერთობის ატმოსფეროში იზრდება..."
2021 წელს ბერა ივანიშვილი ცოლთან და შვილთან ერთად საქართველოდან სამხრეთ კორეაში გადავიდა საცხოვრებლად. მილიარდერ ბიძინა ივანიშვილის რეპერი ვაჟი მაშინ ამბობდა, რომ მუსიკალური კარიერის გაგრძელებას საქართველოს ფარგლებს მიღმა აპირებდა.
იმ დროს მსოფლიოში კორონავირუსის პანდემიის პიკი იყო. ბერა და ნანუკა, პერიოდულად, სოციალურ ქსელში აქვეყნებდნენ ვიდეოებს, სადაც ჩანდა, რომ ისინი სამხრეთ კორეის დედაქალაქ სეულში სხვადასხვა ღირსშესანიშნაობებს სტუმრობდნენ, აღნიშნავდნენ დაბადების დღეებს, იღებდნენ სტუმრებს საქართველოდან. ბერამ სამხრეთ კორეა ისე დატოვა, რომ მისი ახალი მუსიკალური პროდუქტი საზოგადოებას არ უნახავს.
უკვე რამდენიმე თვეა, რაც ბერა და ნანუკა, შვილთან ერთად ბრაზილიაში ცხოვრობენ. წყვილი ამჯერად რიო დე ჟანეიროს ლაჟვარდოვანი სანაპიროდან აქვეყნებენ ფოტოებს.
ივანიშვილის ვაჟისთვის ბრაზილია უცხო ქვეყანა არ არის. ჯერ კიდევ 2019 წელს, ბერამ ამაზონის ტყის გადარჩენასთან დაკავშირებით Facebook-ზე ვიდეომიმართვა გაავრცელა, სადაც ამბობდა, რომ სურს ბრაზილიელ მეგობრებს მხარდაჭერა გამოუცხადოს და ამაზონის ტყის გადასარჩენად ორგანიზაცია დააფუძნა, ბერას თქმით, მან ამაზონის ტყისთვის 1.1 მილიონი აშშ დოლარი გადარიცხა.
ერთ-ერთ ბოლო პოსტზე, რომელიც ბერამ ბრაზილიიდან გამოაქვეყნა, მუსიკოსი წერს, რომ ბედნიერია, რომ მისი შვილი "ზეიმის ატმოსფეროში იზრდება"
"ერთ-ერთი, რითიც ყველაზე მეტად აღფრთოვანებული ვარ ბრაზილიაში, არის ფეხბურთისადმი ვნება და სიყვარული. მე არასოდეს მინახავს ეს არსად მსოფლიოში. ბედნიერი ვარ, რომ ჩემი შვილი ამ ზეიმისა და ერთობის ატმოსფეროში იზრდება..." - წერს ბერა.
გიზიარებთ ივანიშვილების ოჯახის ბრაზილიური ცხოვრების ამსახველ ფოტოებს...