"ჯაბას დიდი ზომის კისტა აქვს ტვინის უჯრედებში, რაც ეპილეფსიას იწვევს. იმ "ჩაფხუტის", სხივების საშუალებით კი კისტის დაშლა ხდება" - ჯაბა მურცხვალაძეს საზოგადოების დახმარება ესაჭიროება
რამდენიმე დღის წინ, კომპლექსში - „ქინგ დევიდი“ თანამედროვე ქართველი მხატვრების საქველმოქმედო გამოფენა-გაყიდვა გაიმართა, რომელიც ორ აჭარელ ბავშვს მიეძღვნა. ორივე მათგანს ჯანმრთელობის პრობლემა აქვს, დიაგნოზი საკმაოდ მძიმეა, მკურნალობა კი დიდ თანხებთანაა დაკავშირებული და მათ საზოგადოების დახმარება სჭირდება...
"კვირის პალიტრასთან" ამ თემაზე საუბრობს შშმ პირი, ბატონი გოგიტა მურცხვალაძე - ჯაბა მურცხვალაძის მამა, ბიჭის, რომელსაც დახმარება სჭირდება; ასევე, გამოფენის ორგანიზატორი - თეკლა რატიანი და მხატვარი - მზია ლეკიშვილი.
გოგიტა მურცხვალაძე:
- გამოფენა-გაყიდვა, რომელიც "ქინგ დავიდში" შედგა, ორ აჭარელ ბავშვს მიეძღვნა, რომელთაც საკმაოდ მძიმე დიაგნოზი აქვთ. გამოფენა ორი დღის განმავლობაში გაგრძელდა კომპლექსში - „ქინგ დევიდი“.
მადლობა მინდა გადავუხადო ყველა იმ ადამიანს, ვინც მხარში ამოგვიდგა - მხატვრებს, რომლებმაც თავიანთი ნამუშევრები საქვემლოქმედო გამოფენას უსახსოვრეს; ქართულ-ამერიკული უნივერსიტეტის სტუდენტებს, რომლებიც გვერდში დამიდგენან ამ კეთილ საქმეში - მარტო მე ამას, რა თქმა უნდა, ვერ შევძლებდი; ასევე ძალიან დიდი მადლობა „ქინგ დევიდის“ ადმინისტრაციის ხელმძღვანელს - ბატონ სოსო ორჯონიკიძეს, რომელმაც დაგვითმო ეს შესანიშნავი სივრცე და ყველაფერს აკეთებენ იმისათვის, რომ გამოფენა მაღალხარისხიანად ჩატარდეს.
გამოფენაზე 50 ცნობილი მხატვრის 65-მდე ტილო იყო წარმოდგენილი. მინდა აღვნიშნო, რომ ყველა მათგანი საკმაოდ ძვირადღირებულია, თუმცა მხატვრებმა დაგვრთეს ნება, რომ ჩვენთვის მისაღები ფასდაკლება გაგვეკეთებინა, რათა სასურველი თანხა შეგროვებულიყო ამ ბავშვების დასახმარებლად. ასევე წარმოდგენილი იყო კორნელი სანაძის საკმაოდ ძვირადღირებული ნახატი, რომელიც მისმა ქალიშვილმა გადმოგვცა და დაგვრთო ნება, რომ სასურველ ფასად გაგვეყიდა. ასევე, აღსანიშნავია, ოლეგ ტიჩენკოს ნახატი.
ეს გამოფენა ჩემთვის პირველი არ იყო. ყველა გამოფენაზე ვცდილობ, სასურველი თანხა შევაგროვო და ბავშვებს დავეხმარო. სამადლობელი ხალხი ძალიან ბევრი მყავს, მხატვრებიდან დაწყებული, ტელევიზიებით დამთავრებული, მადლობა თითოეულ ადამიანს, რომელიც გვერდში მედგა ყოველთვის და დღემდე ასე გრძელდება.
მე ყველგან და ყოველთვის ვამბობ ერთს - მე ვარ იმ ბავშვის მამა, რომლის შვილმაც ფეხი მამა გაბრიელის საფლავზე აიდგა და ის ცხონებული ლალი კუტაიშვილის გადარჩენილია, ბატონი ირაკლის დედის. ძალიან დიდი მადლობა თქვენ, "კვირის პალიტრას", რომელიც ძალიან ბევრ რამეს აკეთებთ ჩემთვის. ცხონებული ლალი კუტაიშვილის დანატოვარი სიკეთე დღესაც გრძელდება მისი შვილების სახით, ჩემს ოჯახსა და ჩემს შვილზე. პატრიარქის კურთხევით, მე და ჩემი ოჯახი პილიგრიმები ვართ. დასავლეთ საქართველოში მხოლოდ ზემო სვანეთის მოლოცვა დაგვრჩა და შემდეგ გადმოვალთ აღმოსავლეთ საქართველოში. ყველა ეკლესია-მონასტერში ვლოცულობთ იმ ადამიანებისათვის, ვინც გვერდში დაგვიდგა, რთულ პერიოდში მარტო არ დაგვტოვა და თავიანთი თანადგომით, მხარდაჭერა გამოხატა ჩემი შვილის მიმართ. ღმერთმა ამრავლოს ასეთი კეთილშობილი ადამიანები საქართველოში.
ambebi.ge-სვის მიცემულ ინტერვიუში გოგიტა მურცხვალაძეს ჰყვებოდა, რომ შვილის თურქეთის კლინიკებში ახალი მეთოდით მკურნალობის შანსი გაუჩნდა, ის იმედოვნებს, რომ მის ვაჟს - ჯაბა მურცხვალაძეს ამ მეთოდით მკურნალობა ჯანმრთელობის მდგომარეობა საგრძნობლად გაუუმჯობესებს.
გოგიტა მურცხვალაძე:
- ქართველი ხალხი დიდსულოვანია, უკვე წლებია მხარში მიდგანან და ჩემი შვილს უანგაროდ ეხმარებიან... ახლა ექიმებმა მომაწოდეს ინფორმაცია, რომ მედიცინის თვალსაზრისით არის სიახლე, მარტივად რომ გითხრათ, სპეციალური "ჩაფხუტი“ არსებობს, რაც პაციენტს თავზე ეხურება და გამა სხივებით ხდება კისტის დაშლა. როგორც იცით, ჯაბას დიდი ზომის კისტა აქვს ტვინის უჯრედებში. "ჩაფხუტს" კი აქვს სადენები, რომელზეც სხივებია შეერთებული. იმ სხივების საშუალებით ხდება სწორედ კისტის დაშლა. ეს ჩემთვის სანუკვარი რამ იყო, რომ ოპერაციის გარეშე მომხდარიყო კისტის გაქრობა. ტვინის უჯრედებში არსებული კისტის კიდევ ერთი ოპერაციის ჩატარება დიდ საშიშროებას უქმნის ჩემი შვილის ჯანმრთელობას. ოპერაცია შეიძლება ფატალურად დამთავრდეს. რადგან ახლა მედიცინა ამის საშუალებას იძლევა, ჯაბას არ დასჭირდება ოპერაცია და კისტა მკურნალობის შედეგად გაქრება. ეს არის საოცარი ამბავი. თუ არ იქნება კისტა, აღარ იქნება ეპილეფსია. როცა ეპილეფსია არ არის, მედიკამენტების დახმარებით, ხდება ტვინის ფუნქციის აღდგენა, რაც თავისთავად გონებრივ განვითარებას იწვევს.
ახლა, რადგან თურქეთიდან ეს ინფორმაცია მაქვს, სტამბოლში ან ანკარაში უნდა ჩავიყვანო, ორივე ქალაქის კლინიკებშია ეგ მეთოდი დანერგილი. თავდაპირველად ხდება პაციენტის ხელახალი გამოკვლევა. შემდგომ ინიშნება მკურნალობა. წინასწარ ფინანსურად თუ არ ვიქნები უზრუნველყოფილი, საქმეს ბოლომდე ვერ მივიყვან. ამიტომ, მინდა, ფინანსურად მზად ვიყო და დავიწყო გამოკვლევა.
როგორც მითხრეს, ამას 15-იდან 20.000 დოლარამდე სჭირდება და გააჩნია, როგორი სიმძიმის პაციენტია. ჯაბას შემთხვევაში, ვიმეორებ, კისტა დიდი ზომისაა და მისი გამა სხივებით დაშლა უნდა მოხდეს. ახლა ჩემს ავადმყოფობაზე აღარ ვფიქრობ, ამ ინფორმაციის მიღების შემდეგ მხოლოდ აქეთკენ ვარ გადართული. ვიდრე ცოცხალი ვარ, ბავშვის ეს მდგომარეობა უნდა გამოვუსწორო - ფიზიკურიც და გონებრივიც. მადლობა და ლოცვა-კურთხევა იმ ხალხს, ვინც ასე, წლების გამავლობაში გვერდით გვიდგას და თანადგომას გვიწევს.
• ქვემოთ მოცემულია საბანკო ანგარიშები, სადაც შეგიძლიათ დაეხმაროთ ჯაბას:
საქველმოქმედო ფონდი "ხომლი" ჯაბა მურცხვალაძის დასახმარებლად. ანგარიშის ნომერი:
საქართველოს ბანკი: GE42BG0000000162421607
თიბისი ბანკი: GE45TB7420136080100007 თიბისი ბანკი. მიმღები: გოგიტა მურცხვალაძე.
ანგარიში: GE57TB7080645064300028 ლიბერთი ბანკი.
ბანკის კოდი: LBRTGE22 მიმღების ანგარიში: GE04LB0711186007624000
თეკლა რატიანი - ქართულ-ამერიკული უნივერსიტეტის სტუდენტური სერვისების მენეჯერი:
- წელს ქართულ-ამერიკული უნივერსიტეტის სტუდენტების აქტიური ჩართულობისა და თანამედროვე მხატვრების გულისხმიერების წყალობით, ჩვენმა სტუდენტებმა მონაწილეობა მიიღეს საქველმოქმედო გამოფენა-გაყიდვის ორგანიზებაში. მოხარულები ვართ, რომ ჩვენი წვლილი მიგვიძღვის ამ ერთობ მნიშვნელოვანი და ძალიან ლამაზი საქველმოქმედო გამოფენის მოწყობაში. გამოფენა-გაყიდვა ორი დღის განმავლობაში გაგრძელდა. გამოფენილი იყო ძალიან მნიშვნელოვანი მხატვრების ნამუშევრები, როგორიცაა რუსუდან ფეტვიაშვილი და სხვები.
მზია ლეკიშვილი, მხატვარი:
- საქველმოქმედო გამოფენაზე ჩემი ერთი ნახატი წარმოვადგინე, სახელწოდებით - „აბსტრაქტული ყვავილები“. ბატონი გოგიტა "ფეისბუქ" გვერდის საშუალებით დამიკავშირდა და მთხოვა, საქველმოქმედო გამოფენისთვის ერთი ნახატი მეჩუქებინა. რა თქმა უნდა, დავთანხმდი. მართალია, მანამდეც ვიცოდი, რომ შვილი ჰყავდა ავად, თუმცა დეტალები მხოლოდ შემდგომ, მისი მონაყოლიდან გავიგე. მე პირადად ექიმი ვარ, 25 წლიანი გამოცდილება მაქვს. ხატვა მხოლოდ ორი წელია, რაც დავიწყე. შესაბამისად, ძალიან კარგად ვიცი, რა რთულია, როცა მშობელს არ აქვს საშუალება შვილს სამედიცინო დახმარება გაუწიოს. ამ ყველაფერმა ჩემზე ძალიან იმოქმედა და ჩემი ნახატი სიხარულით ვუსახსოვრე ფონდს. მოხარული ვარ, რომ მეც ჩემი წვლილი შევიტანე ამ კეთილ საქმეში.
მარიამ ჭანტურია (სპეციალურად საიტისთვის)