"ბრალდებლთაგან ერთმა აღიარა, რომ მოკლულისთვის ამოჭრილი ორგანო შეჭამა" - პროკურორი კანიბალიზმის ნიშნებზე ლაპარაკობს - კვირის პალიტრა

თბილისის საქალაქო სასამართლოში დამამძიმებელ გარემოებებში დედის განზრახ მკვლელობაში ბრალდებულისა და ამ საქმეზე დაკავებულების საქმეზე სასამართლო პროცესი მიმდინარეობს. სხდომა დახურულია, რადგან ერთ-ერთი ბრალდებული არასრულწლოვანია.

დაკავებულთა მიმართ აღკვეთის ღონისძიების შეფარდების მოთხოვნით პროკურატურამ სასამართლოს გუშინ მიმართა - ბრალდების მხარე ხუთივე დაკავებულისთვის აღკვეთის ღონისძიების სახით პატიმრობას ითხოვს.

სასამართლო სხდომის დაწყებამდე კომენტარი გააკეთა საქმის პროკურორმა ზვიად ფხაკაძემ. მისი თქმით, საქმეში კანიბალიზმის ნიშნები იკვეთება:

"ქალი ჯერ მოკლეს, შემდეგ კი კიდურები მოაჭრეს, ასევე ამოაჭრეს ორგანოები. ბრალდებლთაგან ერთმა აღიარა, რომ მოკლულისთვის ამოჭრილი ორგანო შეჭამა. თუ ვინ აღიარა, გამოძიების ინტერესიდან გამომდინარე, ჯერ არ დავასახელებ. დანაშაულის მოტივად იკვეთება პირადი ინტერესი, ანუ ის, რომ მოკლულის ქალიშვილს მუდმივად კონფლიქტი ჰქონდა დედასთან და სწორედ ამიტომ გადაწყვიტა მისი თავიდან მოშორება. დანაშაულს აღიარებს 2 ბრალდებული - ბექა შენგელია და მოკლულის ქალიშვილი, კიდევ ერთი თანამონაწილე არასრულწლოვანია და მას აღიარებითი ჩვენება არ მიუცია, ამ დრომდე დუმილის უფლებას იყენებს".

რაც შეეხება რიტუალურ მკვლელობას, რაზეც შსს-ს განცხადებაში იყო ლაპარაკი, პროკურორის თქმით, ეს ეჭვი, ახალგაზრდების "ფეისბუკგვერდების" დათვალიერებისა და მათი ცხოვრების წესის შესწავლის შედეგად გაჩნდა.

როგორც პროკურორმა განაცხადა, ორი პირი ბრალდებულია დანაშაულის შეუტყობინებლობაში, მათგან ერთი ბექა შენგელიას მამიდაშვილი დათა კვარაცხელიაა, რომლის ადვოკატის თქმითაც, მისი დაცვის ქვეშ მყოფი არ აღიარებს დანაშაულს, ამიტომაც ისინი მის გათავისუფლებას 2000 ლარიანი გირაოს სანაცვლოდ მოითხოვენ, თუმცა პროკურორი მიიჩნევს, რომ სასამართლომ ეს მოთხოვნა არ უნდა გაიზიაროს.

"საქმეში არაერთი მტკიცებულებაა, რომელიც ამ ადამიანების ბრალეულობას ამტკიცებს, მათ შორის კანონიერი მიყურადების დროს ამოღებული ჩანაწერები, აღიარებითი ჩვენებები და ა.შ." - განაცხადა საქმის პროკურორმა.

მისივე თქმით, საქართველოს სისხლის სამართლის კოდექსში კანიბალიზმის და რიტუალური მკვლელობის დასჯადი მუხლი არ არსებობს, ამიტომაც ბრალი წაყენებული აქვთ 109-ე მუხლით, რაც განსაკუთრებული სისატიკით ჩადენილ ჯგუფურ განზრახ მკველობას გულისხმობს.

იხილეთ ასევე: "დედის მერე, მამაც უნდა მომეკლაო" - შემზარავი მკვლელობის ახალი დეტალები

თეა ხურცილავა (სპეციალურად საიტისთვის)