"წავიდა და დაასრულა დიდი ეპოქა... ლეგენდარული თაობის უკანასკნელი მოჰიკანი" - თენგიზ არჩვაძე გარდაიცვალა
ქართველი მსახიობი, საქართველოს დამსახურებული არტისტი თენგიზ არჩვაძე გარდაიცვალა. ინფორმაციას ნოდარ დუმბაძის სახელობის მოზარდ მაყურებელთა თეატრის პროდიუსერი, დიმიტრი ღვთისიაშვილი სოციალურ ქსელში ავრცელებს.
"წავიდა დიდი ქართველი არტისტი! დიდი ქართველი! ძალიან დიდი! ჩემი უფროსი მეგობარი!!!" - წერს დიმიტრი ღვთისიაშვილი.
"წავიდა... უდიდესი კაცი და არტისტი... წავიდა და დაასრულა დიდი ეპოქა... უკანასკნელი იყო... იმ ლეგენდარული თაობის უკანასკნელი მოჰიკანი...თენგიზ არჩვაძე 1932 - 2023" - წერს სანდრო ელოშვილი.
თენგიზ არჩვაძე 1932 წლის 3 აგვისტოს თბილისში დაიბადა. 1955 წელს დაამთავრა თბილისის სახელმწიფო თეატრალური ინსტიტუტის სამსახიობო ფაკულტეტი.
1954 წლიდან კოტე მარჯანიშვილის სახელობის სახელმწიფო თეატრის მსახიობია; 1967-1972 წწ. რუსთავის თეატრის მსახიობი; მის მიერ შესრულებული როლებიდან აღსანიშნავია: "მოკვეთილი", "დედა", "ღალატი", "თვალი პატიოსანი", "როცა ქალაქს სძინავს" "მე ვხედავ მზეს", "დღის წესრიგშია ერთი საკითხი", "კვაჭი კვაჭანტირაძე", "30 აგვისტო", "ჯორდანო ბრუნო" და სხვ. 1960 წლიდან კინოსტუდია "ქართული ფილმის" მსახიობი;
გადაღებულია ფილმებში: თამაზი ("კეთილი ადამიანები", 1961), ზაზა ("ერთი ცის ქვეშ", 1961), გუგუა ("ხევისბერი გოჩა", 1964), "ხევსურული ბალადა" (1965), არსაკიძე ("დიდოსტატის მარჯვენა", 1969), მუშნი ზარანდია ("დათა თუთაშხია", 1977), დათიკო ("მე ვხედავ მზეს"), ნამორაძე ("შეხვედრა წარსულთან"), ვახტანგი ("შეხვედრა მთაში"), ბიძინა ("მალე გაზაფხული მოვა")და სხვ. 2017 წელს მიენიჭა "ხელოვნების ქურუმის" წოდება.
"ერთხელ მკითხეს,ზარანდიას უარყოფითი გმირის როლზე თენგიზ არჩვაძე რატომ შეარჩიეო"