ეკლესიის წინ ორი ბავშვი დაუკრძალავთ და საფლავზე არყის ხე დაურგავთ, ხე ორ ტოტად ამოწვერილა და დღეს უკვე ორ უზარმაზარ ხედაა ქცეული
იხილეთ დასაწყისი - სვანური რიტუალებიდან სწორედ ლიფაანალი ყოფილა ყველაზე იდუმალი, სევდიანი და საკრალური
ჩვაბიანიდან ნაკიფარისკენ გავეშურეთ. იფარის თემის სოფელი ნაკიფარი ზღვის დონიდან 1600 მეტრზე მდებარეობს. ამ სოფლის X საუკუნის წმინდა გიორგის ეკლესიაში იმ დროს მივედით, მომლოცველებისთვის სიწმინდეები რომ გამოჰქონდათ.
ტაძარი მეფის მხატვარს - თევდორეს მოუხატავს. თევდორეს მოხატული ყოფილა იფრაალისა და კალის ტაძრებიც (იმ დღეს იფრაალშიც ავედით, მაგრამ მასზე მომდევნო ბლოგში გიამბობთ).
ნაკიფარის წმ. გიორგის ეკლესიის წინ ორად ატოტილი არყის უზარმაზარი და ულამაზესი ხე იდგა. იქვე გვითხრეს, რომ, დაახლოებით, ორმოცი წლის წინ შესასვლელთან ორი პატარა ბავშვი დაუკრძალავთ და მათ საფლავზე არყის ხე დაურგავთ. დროთა განმავლობაში ის ხე ორ ტოტად ამოწვერილა და დღეს უკვე ორ უზარმაზარ ხედაა ქცეული.
ტაძარში შესვლისთანავე კონქის კომპოზიცია და მაცხოვრის უზარმაზარი ფიგურა მოგვხვდა თვალში. აქვე იყო წმ. გიორგისა და წმ. თევდორეს გამოსახულებები, წმ. გიორგის სასწაულების, მისი კირის ორმოში წამების, რკინის ფოცხებით ხვეტისა და თავის კვეთის გასაოცარი ფრესკები.
ტაძარში დაცულია ქართული ჭედურობის ერთ-ერთი ღირსშესანიშნავი ნიმუში - XI საუკუნის წმ. გიორგის ხატი. აქვე საგულდაგულოდ ინახავენ ოქროსა და ვერცხლის ნივთებს, რომელთა შორის გამორჩეულია ბაჯაღლო ოქროს თასი.
სწორედ ეს თასი გამოაბრძანეს ტაძრიდან და აგვიხსნეს: როცა თასი გამოგვაქვს, აუცილებლად უნდა იდღეგრძელოთ, დაილოცოთო. ცოტ-ცოტა სასმელით ყველამ ვადღეგრძელეთ სვანები, სვანეთი და მისი მთებიდან დანახული სრულიად საქართველო.
თავიდან ვერც წარმოვიდგენდით, ჯამში არაყი თუ ესხა, რატომღაც გვეგონა, ღვინით შეგვივსეს და თითოეულს ერთი და იგივე შეცდომა მოგვივიდა - ნელ-ნელა მოვინდომეთ "ღვინის" დაგემოვნება და კინაღამ გავიგუდეთ.
მერე საკუთარ თავს დავცინოდით, აბა, ამოდენა სიმაღლეზე, სადაც ვაზი არსად შეგვხვედრია, შინ დამზადებულ ღვინოს როგორ შემოგვთავაზებდნენ. მთაში ვიყავით და, რასაკვირველია, საუკეთესო არაყი უნდა მოერთმიათ!
ნაკიფარიდან აშკარად სულიერად და ფიზიკურად გაძლიერებულები წამოვედით და ამ მადლიანი მხარის მადლის ნაწილი გზადაც გამოვიყოლეთ - სხვაგვარად ვერც იფრაალში მოსახვედრად ავივლიდით 3 კილომეტრს თაკარა მზეში.
(გაგრძელება იქნება)