"დრონების ცვენა" პუტინის მშობლიურ ქალაქში - სტალინისდროინდელი ლენინგრადი უკეთესად იყო დაცული, ვიდრე - დღევანდელ სანქტ-პეტერბურგს იცავენ ჰაერიდან
სანქტ-პეტერბურგში დრონით თავდასხმამ რუსეთის ჩრდილო-დასავლეთით მდებარე უდიდეს ნავთობგადამამუშავებელ კომპლექსში, „პეტერბურგის ნავთობტერმინალში“ ხანძარი გამოიწვია.
ამ მწირი ინფორმაციის უკან კი ორი მნიშვნელოვანი გარემოება იმალება...
პირველი - უკრაინულმა კამიკაძე-დრონებმა მერამდენედ მოახერხეს რუსეთის პრეზიდენტის „მშობლიური“(თუკი პუტინს მართლაც ქართულ სოფელ მეტეხში არ გაუტარებია ბავშვობა) ქალაქის -ლენინგრად-სანქტ-პეტერბურგის ხანძრების შავი კვამლით დაფარვა.
მეორე - დღეს ქალაქში „პეტერბურგის საერთაშორისო ეკონომიკური ფორუმი“ იხსნება, რომელსაც 130 ქვეყნიდან უცხოელი ბიზნესმენებიც დაესწრებიან, ხოლო თავად რუსეთის პრეზიდენტს კი 5 ივნისს ელოდებიან.
პუტინისთვის ეს ორმაგი დარტყმა გამოდის - მშობლიურ ქალაქზე მერამდენე საჰაერო შეტევა-აფეთქებებით და თანაც - სპეციალურად დამთხვევა „პეტერბურგის საერთაშორისო ეკონომიკური ფორუმის“ გახსნის დღეს, მაშინ, როდესაც პუტინი ამ ყოველწლიურ საერთაშორისო ფორუმს თავის „პირმშოდ“ თვლის და 2005 წლიდან მოყოლებული, ყოველთვის ესწრება.
რუსეთის ჩრდილო-დასავლეთით მდებარე უდიდესი ნავთობგადამამუშავებელი კომპლექსი, „პეტერბურგის ნავთობტერმინალი“ სანქტ-პეტერბურგის პორტში 37 ჰექტარზეა გადაჭიმული და ის წელიწადში 12,5 მლნ ტონა ნავთობროდუქტს გადაამუშავებს, რომელთა შესანახად განთავსებულია 21 უზარმაზარი რეზერვუარი, რომლებიც გახდნენ კიდეც უკრაინული კამიკაძე-დრონების მთავარი სამიზნე.
ლენინგრადის გუბერნატორი (ქალაქს კი დაუბრუნეს სანქტ-პეტერბურგის სახელი, მაგრამ ოლქს ისევ ლენინის სახელი დაუტოვეს) აცხადებს, რომ 50 უკრაინული კამიკაძე-დრონის ჩამოგდება შეძლეს, თუმცა ჩუმდება თვითმხილველების მიერ გადაღებული და გავრცელებული ვიდეოკადრების კომენტირებისას. არადა, ამ ვიდეოებში კარგად ჩანს, თუ ერთმანეთის მიყოლებით უკრაინული AN-196 Liutyi -სა და FP-2 -ის ტიპის კამიკაძე-დრონები დაბალ სიმაღლეზე როგორ თავისუფლად მიფრინავენ „პეტერბურგის ნავთობტერმინალისკენ“ და პიკირებენ ნავთობპროდუქტებით სავსე რეზერვუარებზე, რის შემდეგაც არანაკლებ სამი რეზერვუარიდან სქელი შავი კვამლი იწყებს ამოსვლას და ნელ-ნელა გადაეფარება 5,6-მლნ-იან, რუსეთის სიდიდით მეორე ქალაქს...
გასაოცარი, იცით, რა არის?
ამ უკრაინული კამიკაძე-დრონების ფრენის მაქსიმალური სიჩქარე 180 კმ/სთ-მდეა ანუ უტოლდება პირველი მსოფლიო ომის დროინდელი ბიპლანების სიჩქარეს, მაშინ, როდესაც მეორე მსოფლიო ომის დროს ლენინგრადზე საჰაერო შეტევებში მონაწილე გერმანული „ლუფთვაფეს“ ბომბდამშენების სიჩქარე ორჯერ, ხოლო გამანადგურებლების კი - სამჯერ მეტი იყო, თუმცა სტალინის მეზენიტეები „მაქსიმის“ ტყვიამფრქვევებით მათ ბევრად უფრო მეტი წარმატებით იგერიებდნენ, ვიდრე დღეს სანქტ-პეტერბურგს იცავენ პუტინის თანამედროვე საზენიტო-სარაკეტო კომპლექსები, ზებგერითი თვითმფრინავები თუ დამრტყმელი შვეულმფრენები...
ასევე დაგაინტერესებთ: რუსული "ისკანდერებით" კიევზე...ისევე როგორც გერმანული "ფაუ-2"-ებით ლონდონზე...
"ზებრა-კამაზები" ანუ რატომ ვერ უშველის პუტინის არმიას სამხედრო ტექნიკის კამუფლირება?!
ნუთუ უკრაინამ მიაგნო პუტინის არმიის „აქილევსის ქუსლს“ და რას შეცვლის ეს ფრონტის ხაზზე...
როგორც ჩანს, ზელენსკიმ ამ სახით გადაუხადა სამაგიერო პუტინს, კიევის ბოლო დაუნდობელი დაბომბვისთვის...
განსხვავება სახეზეა - მაშინ როდესაც რუსული „ისკანდერები“ უკრაინის დედაქალაქში საცხოვრებელ კორპუსებს აფეთქებენ, რუსეთის ყოფილ დედაქალაქში უკრაინული „ლიუტები“ სამიზნედ მშვიდობიან მოსახლეობას კი არა, არამედ - იმ ნავთობტერმინალებს ირჩევენ, საიდანაც საწვავი მიეწოდება უკრაინის წინააღმდეგ მებრძოლ რუსეთის საოკუპაციო ძალების ტანკებსა და ბომბდამშენებს...
ვიდეო: 3 ივნისის გამთენიისას რუსულ „პეტერბურგის ნავთობტერმინალზე“ უკრაინული საჰაერო შეტევა